Ինչո՞ւ որբացնել սեփական երեխաներին, եթե կարելի է պարզապես մի քիչ զգոն լինել. Արսեն Արշակյան

Երևան ՃՈ պետ Արսեն Արշակյանը ֆեյսբուքյան իր էջում գրել է.

«Ճանապարհատրանսպորտային պատահարների վիճակագրությունն առաջին հայացքից զուտ թվային ցուցանիշ է: Սակայն, այդ դեպքերից յուրաքանչյուրը մի ընտանիքի ողբերգություն է, մանավանդ եթե ավարտվել է մահվան ելքով: Ամեն անգամ, երբ մենք' ՃՈ պատասխանատուներս, երթևեկության կանոնները պահպանելու, սահմանված արագությունը չգերազանցելու կոչ ենք անում, մեր հոգու խորքում հավատում ենք, որ 10 վարորդից մեկը գոնե ականջալուր կլինի: Ցավոք, իրականությունն այլ բան է հուշում:

Երբեմն մեղավոր եմ համարում նաև մեզ, մտածում եմ' գուցե ավելի շատ պետք է կոչ անենք, խոսենք այդ մասին, աշխատանքներ իրականացնենք, մյուս կողմից էլ մտածում եմ' բայց մի՞թե պետք է հիշեցնել այդ մասին: Չէ՞, որ կյանքում ամենաթանկը հենց կյանքն է, որ մի անգամ է տրված յուրաքանչյուրիս: Ինչո՞ւ այդքան դաժան վարվել սեփական կյանքի հետ, ինչո՞ւ որբացնել սեփական երեխաներին, հարազատ մարդկանց, ծնողներին: Ինչու, եթե կարելի է պարզապես մի քիչ զգոն լինել, մի քիչ զգույշ վարել, չգերազանցել արագությունը:

Մահվան ելքով յուրաքանչյուր դեպք ողբերգություն է նաև մեզ համար: Ակամայից նաև մենք' դեպքի վայր մեկնող ՃՈ, շտապօգնության ու փրկարար ծառայության աշխատակիցներս ենք ապրում այդ ցավը: Մարդկայնորեն դժվար ու դաժան է գիտակցել, որ անզոր ես առաջին օգնությունը ցուցաբերել ու փրկել մարդու կյանքը:

Սիրեք կյանքը, զգույշ ու զգոն եղեք, պահպանեք երթևեկության կանոնները, ոչ սթափ վիճակում մի նստեք ղեկի մոտ: Երբեմն մեր վարորդները կարծում են, որ գիշերը կարելի է արագ վարել: Ցավալի է, բայց փաստ, որ դժբախտ պատահարների զգալի մասը տեղի է ունենում հենց գիշերվա ժամերին, ալկոհոլի ազդեցությամբ ու արագության գերզանցմամբ…

Նման ողբերգական դեպք արձանագրվել է նաև այսօր լուսադեմին, ՃՏՊ-ին զոհ է գնացել երեք մարդ…»: