Նիկոլա Բրյուք. ԵԺԿ-ի կողմից լիակատար աջակցություն Հայաստանի իշխանություններին

Ինչպես հայտնում է ԱՐՄԵՆՊՐԵՍ լրատվական գործակալությունը` Եվրոպայի ժողովրդական կուսակցությունը լիակատար կերպով աջակցում է Հայաստանի իշխանությունների բոլոր  համարձակ բարեփոխումներին:

Այս մասին այսօր ՀՀԿ տնտեսական կոնֆերանսի ընթացքում նշեց ԵԺԿ ներկայացուցիչ, կուսակցության արտաքին կապերի պատասխանատուներից Նիկոլա Բրյուքը` հավելելով, որ միայն այդ դժվարին բարեփոխումների իրականացումը արդարադատության, մարդու իրավունքների պաշտպանության և կոռուպցիայի դեմ պայքարի ոլորտներում կերաշխավորեն Հայաստանի անկախությունն ու ինքնիշխանությունը:

«ԵԺԿ-ն իր ողջ փորձառությունը կներդնի և կաջակցի Հայաստանի իշխանություններին և ՀՀԿ-ին այս գործընթացն իրականացնելու համար: Մեր երկու կուսակցությունների համագործակցությունը գնալով կամրապնդվի, դրա վառ ապացույցի ականատեսը կլինեք առաջիկայում»,- համոզմունք հայտնեց Ն.Բրյուքը:

Նա տեղեկացրեց, որ ՀՀ նախագահ Սերժ Սարգսյանը և վարչապետ Տիգրան Սարգսյանը հրավիրվելու են դեկտեմբերին Մարսելում կայանալիք ԵԺԿ-ի համագումարին: Ն.Բրյուքի խոսքով` ԵՄ-ն և Հայաստանը կիսում են համատեղ ժառանգություն և համատեղ արժեքներ և նրանց համագործակցությունը ստանում է լիակատար աջակցություն ԵԺԿ-ի կողմից: