Քաղաքապետարան-ոստիկանություն- «Փարկինգ սիթի» աբսուրդային շղթան. ինչպես են այս կառույցները իրար վրայից գցում քաղաքացուն շորթելու պատասխանատվությունը (տեսանյութ)

Բագրատ Հարությունյանը ֆեյսբուքյան իր էջում գրել է.

«Օրը բացվեց ... կոլեգայիս տուգանել են Մաշտոց-Խորենացի /դեպի Սարյան/ հատվածում կայանվելու համար 5000դր չափով /մեջբերում ՃՈ որոշումից - MERCEDES-BENZ մակնիշի 71AN707 համարանիշի տրանսպորտային միջոցի վարորդը 06.02.2014թ. ժամը 17:41-ին ք. Երևան, Մաշտոցի պողոտա / Խորենացու խաչմերուկի հատվածում չի կատարել ՀՀ Կառավարության 2007թ.-ի 955-Ն որոշմամբ սահմանված 3.27 «Կանգառն արգելվում է» ճանապարհային նշանի պահանջը, որը նախատեսված է Վարչական իրավախախտումների վերաբերյալ ՀՀ օրենսգրքի 124-րդ հոդվածի 1-ին մասով: Ելնելով վերոգրյալից և ղեկավարվելով Վարչական իրավախախտումների վերաբերյալ ՀՀ օրենսգրքի 32-րդ հոդվածի 3-րդ մասով, 224-րդ հոդվածի 2-րդ մասի 3-րդ կետով/:
Առաջին հայացքից ոչ մի արտասովոր բան, բաաաաայց

1. CPS, որը պատասխանատու է գծանշման համար /աշխատակցի անունը չենք հրապարակի/ պնդում է, որ գծանշումից հետո, քաղաքապետարանի տրանսպորտի վարչությունը տեղադրել է կանգառն արգելող նշան: Իրենց համար դեռ պարզ չէ, որն է նշանի հայտնվելու պատճառը, և ինչ պետք է անեն + նույն հարցով ևս 4 վարորդ իրենց դիմել է:

2. ՃՈ ասում է, մենք կոլլիզիայի հետ կապ չունենք. և՛ նշանը, և՛ կարմիր գիծը քաղաքապետարանի տրանսպորտի վարչության իրավասության մեջ է:

3. ԵՔ ՏՎ պատասխանատուն ասում է, այդ կարմիր գծերը չարամիտ և դեռևս անհայտ քաղաքացիներն են գծել, եթե ուշադիր լինեինք կտեսնեինք որ «կարմիր գծերը» այնքան էլ «կարմիր չեն» /Հիշեցնեմ, որ այս պնդումը հակասում է առաջին կետին/ + Բարձրյալը մեզ աչք է տվել, որ տեղանքն ուսումնասիրենք և տեսնեք, այլ նշաններ և Փարքինգ Սիթիի իրազեկող վահանակը չկան արդյոք...:

Բայց ամենազավեշտալին այն է, որ բոլորն էլ ասում են «եղածը 5000 չի, մուծի՝ պրծի...», իսկ հակասության ընթացք տալու մասին ոչ մի խոսք...

Ինչ կարելի է կարծել ... տրանսպորտի վարչությունում սուտը լայնորեն կիրառվող հնարք է քաղաքացիների հետ շփելու ընթացքում, այդ վարչությունում աջ ձեռքը ձախից տեղյակ չէ և ընդհանրապես կարգի հաստատման փոխարեն վարչությունը քաոս է ծնում ամեն իր շարժումով ...»: