«Չորրորդ ինքնիշխանություն». ԵԿՄ-ի քայլերը տրամաբանությանը հակառակ են

ԵԿՄ-ում տեղի ունեցող զարգացումները իրոք որ սովորական տրամաբանության մեջ դժվար է տեղավորել: Մեկ այդ կառույցն ասում է, թե չի զբաղվում քաղաքականությամբ, մեկ էլ թե' սատարում են Սերժ Սարգսյանին, գրում է «Չորրորդ ինքնիշխանություն»-ը: 

Քաղաքականությամբ զբաղվել-չզբաղվելու հարցում ԵԿՄ-ի վերջին տարիների էվոլյուցիան իրոք որ ուշագրավ է: Օրինակ, 2008-ի փետրվարին ԵԿՄ մի շարք անդամներ հայտարարել էին ԵԿՄ-ից դուրս գալու մասին' այդ կառույցի քաղաքականությամբ զբաղվելու պատճառաբանությամբ: «Փետրվարի 19-ին կայացած նախագահական ընտրություններից հետո ԵԿՄ որոշ անդամներ' խախտելով ԵԿՄ-ի կանոնադրությունը, առանց վարչության համապատասխան որոշման, սկսել են զբաղվել երկրապահին ոչ վայել գործունեությամբ, որն անընդունելի է եւ վարկաբեկում է միության նշանակությունն ու հեղինակությունը, խոչընդոտում է մեր նորանկախ պետության հետագա ամրապնդման եւ զարգացման գործընթացը: Նրանք օգտագործվում են անազնիվ քաղաքական նպատակներով, իսկ ԵԿՄ ղեկավարությունը ոչ մի միջոց չի ձեռնարկում այդ ամենը կանխելու ուղղությամբ: Այդ պատճառով, գնահատելով եւ արժեւորելով երկրապահի դերն ու նշանակությունը, զոհված ազատամարտիկ-ընկերների բարի անունն ու հիշատակը, ինչպես նաեւ առաջնորդվելով հայրենիքի նկատմամբ ունեցած պարտքի մեծ զգացումով ու ժողովրդին անմնացորդ ծառայելու հաստատուն որոշմամբ' մենք հայտարարում ենք, որ դադարեցնում ենք անդամակցությունը կազմակերպությանը»,- ասված էր այդ հայտարարության մեջ:

Հայտարարությունը ստորագրել էին մի քանի գեներալներ եւ գնդապետներ, այդ թվում' գեներալներ Սեյրան Օհանյանը, Արշալույս Փայտյանը, Հայկազ Բաղմանյանը, Լեւոն Երանոսյանը, Կամո Աղաջանյանը, Սամվել Կարապետյանը (Օգանովսկի): 2008-ի մայիսի 9-ին ԵԿՄ նախագահ Մանվել Գրիգորյանը ուղերձ էր հղել, որտեղ, մասնավորապես, ասված էր. «Ամենայն պատասխանատվությամբ հայտարարում եմ' Երկրապահը երբեք քաղաքականությամբ չի զբաղվել եւ չի զբաղվելու: Ոչ ոք թող չշահարկի Երկրապահի անունը»: 2012-ի փետրվարի 18-ին արդեն ԵԿՄ նախագահ Գրիգորյանը, համագումարի ժամանակ դիմելով դահլիճում ներկա Սերժ Սարգսյանին ասում է. «Մենք մեր ակտիվ մասնակցությունը պետք է ունենանք առաջիկա բոլոր ընտրություններին: Դուք մեր մարտական ընկերն եք, այսօր էլ բանակի գերագույն հրամանատարն եք: Մենք սատարում ենք Ձեզ' Ձեր բոլոր նախաձեռնություններում, որոնք ուղղված են ի շահ հայրենիքի: Դուք ջանք ու եռանդ չեք խնայում կառուցելու հզոր Հայաստան, որտեղ բարեկեցիկ կապրեն մեր ընտանիքները: Դա մեր զոհված ընկերների երազանքն է»: Մեկնաբանություններն, ինչպես ասում են, ավելորդ են: