Ստամբուլի Թաքսիմ հրապարակում հայտնաբերված հայկական գերեզմանաքարերը տարվել են Շիշլիի գերեզմանատուն

Ստամբուլի Թաքսիմ հրապարակի Գեզի զբոսայգում շինարարական աշխատանքների ժամանակ հայտնաբերված հայկական գերեզմանատան քարերը, որոնք մնացել էին նախկինում այստեղ գտնվող Սուրբ Հակոբ գերեզմանատնից, տեղափոխվել են Շիշլիի հայկական գերեզմանատուն: Այս մասին տեղեկացնում է «Ակոս» պարբերականը:

Հնագիտության թանգարանի կատարած ուսումնասիրություններից հետո շիրմաքարերը բերվել և դասավորվել են գերեզմանատան դատարկ հատվածներում:

Գեզիի շինարարական աշխատանքների ժամանակ հայտնաբերվեցին հայկական գերեզմանատան 16 շիրմաքար: Դրանք տարվել էին հնագիտության թանգարան, որտեղ պարզվել էր, որ գերեզմանաքարերը թվագրվում են 17-րդ դարի երկրորդ կեսից մինչև 19-րդ դարի վերջն ընկած ժամանակահատվածով: Գերեզմանաքարերից մեկի գրությունը ջնջված էր և անընթեռնելի, երկուսը' առանց գրության էին: Հինգի վրայից հնարավոր էր ընթերցել միայն տարեթիվը: Մնացած քարերի ընթեռնելի գրություններից հայտնի էր դառնում դրանց տակ թաղված մարդկանց սեռը, մասնագիտությունն ու անգամ ծնննդյան վայրը:

Ստամբուլի Բանգալթը թաղամասի Սուրբ Հակոբ հայկական գերեզմանատունը գործել է 1551-1939 թվականների ընթացքում: 1930-ականների վերջին թուրքական իշխանությունները հայկական գերեզմանոցի տեղում կառուցել են Գեզի զբոսայգին, ինչպես նաև «Դիվան», «Հիլթոն» և «Հայաթ» հյուրանոցները, TRT ռադիոընկերության շենքը: