«Առավոտ». Արամ Սարգսյանը ԵԿՄ-ում միշտ սպասված մա՞րդ է

Թերթը հիշեցնում է,  որ Սպարապետ Վազգեն Սարգսյանի եղբայրը՝ «Հանրապետություն» կուսակցության քաղխորհրդի նախագահ Արամ Սարգսյանը, առաջին անգամ ԵԿՄ-ից այդ կազմակերպության՝ շաբաթ օրը տեղի ունեցած համագումարին մասնակցելու հրավեր չէր ստացել:Թե ինչու՝ թերթի խնդրանքով պարզաբանեց ԵԿՄ վարչության նախագահ, գեներալ Մանվել Գրիգորյանի խորհրդական Վարդան Վարդանյանը:Նրա մատուցմամբ՝ ԵԿՄ-ն համագումարին մասնակցելու հրավեր ուղարկել էր Սպարապետի ծնողներին, Վազգեն Սարգսյանի եղբայրն էլ՝ Արմեն Սարգսյանը, լինելով ԵԿՄ անդամ, մասնակցել է համագումարին և վերընտրվել «Երկրապահների» ղեկավար մարմնի վարչության կազմում: Ինչ վերաբերում է կոնկրետ  Արամ Սարգսյանին, ապա Վարդանյանի ասելով՝ ԵԿՄ-ում դրա վրա չեն էլ սևեռվել՝ թերևս, ավելորդ ձևականություն համարելով, որովհետև ԵԿՄ-ն Արամ Սարգսյանի ավագ եղբոր՝ Սպարապետ Վազգեն Սարգսյանի հիմնադրած կազմակերպությունը, տուն է, ուր Արամ Սարգսյանը կարող է մտնել առանց հրավերի տանտիրոջ իրավունքով:«Գուցե, մենք իսկապես թերացել ենք ու պիտի հատուկ հրավիրեինք, բայց բոլոր դեպքերում որևէ միտում այստեղ չի եղել և չկա:Արամ Սարգսյանը ԵԿՄ-ում միշտ սպասված մարդ է, նա կարող է ցանկացած պահի առանց հրավերի գալ ԵԿՄ, մասնակցել համագումարներին, անգամ որոշել՝ ում հրավիրել և այլն»: