Սևան Նիշանյանի դեմ նոր հետաքննություն են սկսել

Թուրքահայ լեզվաբան Սևան Նիշանյանի հանդեպ խտրական վերաբերմունքն ու հետապնդումները շարունակվում են նաև բանտում: Այս մասին հայտնի է դարձել Նիշանյանի ֆեյսբուքյան էջից, որը նրա' բանտում գտնվելու ընթացքում վարում է որդին:

Նիշանյանը տեղեկացրել է, որ վերջին հոդվածներից մեկի պատճառով իր դեմ հետաքննություն են սկսել' ծառայողներից մեկին նվաստացնելու մեղադրանքով: Բանտի տնօրենը նրան կանչել է իր մոտ, և հայ մտավորականից ցուցմունք են վերցրել: Նիշանյանի համոզմամբ, մի քանի օր հետո իրեն կարող են տեղափոխել փակ բանտ: «Իրական պատճառն այդ հոդվածը չէր: Ինչ եկել եմ այս բանտ, ասում են, թե այստեղի «խերը» կորել է: Գնամ, կկարողանան հանգիստ շունչ քաշել»,-ասել է Նիշանյանը:

Ավելի վաղ Նիշանյանը նամակ էր գրել լրագրող Հասան Ջեմալին, որով հայտնել էր, որ բանտում իրեն չեն վերաբերվում այնպես, ինչպե մյուս ազատազրկվածներին: Նրա խոսքով` «վերևից եկած կարգադրությամբ» ինքը խտրական վերաբերմունքի է ենթարկվում: Նամակում լեզվաբանը պատմել էր, որ բանտ գալու առաջին օրերին իրեն շատ լավ են վերաբերվել, հարգել են նրա գրող լինելու հանգամանքը: Անգամ բանտապետը 2-3 անգամ հրավիրել է իր մոտ և զրուցել են, ինչից հետո իր իսկ ցանկությամբ նշանակել են բանտի գրադարանավարի պաշտոնում' խոստանալով համակարգիչ և համացանց տրամադրել, որպեսզի Ն իշանյանը կարողանա աշխատել իր գրքի վրա:

«Երեք օր անց վերևներից զանգահարեցին, և տրամադրվածությունը փոխվեց: Դեմքերը խոժոռվեցին: Սկսեցին հայացքները փախցնել ինձնից, վատ խոսքեր ասել: Փոփոխությունները դեռ չվերջացած' գրադարանը փակվեց, աշխատանքիս վերջ տրվեց: Համակարգիչ ստանալու պահանջս մերժվեց: Սկսեցին ինձ վախեցնել»,-պատմել է Նիշանյանը' ասելով, որ իրեն սկսել են նախազգուշացնել' ասելով, որ առաջին իսկ սխալի դեպքում կտեղափոխեն փակ բանտ: Եթե բաց բանտում գտնվող մյուս մարդկանց իրավունք է տրվում աշխատել դրսի հասարակական կազմակերպություններում, ապա Նիշանյանին ասել են. «Եթե կցանկանաս բանվոր լինել, քեզ կուղարկենք քաղաքային գերեզմանատուն», այլ աշխատանք նրա համար չկա:

Թուրքիայի արդարադատությունը մեղավոր էր ճանաչել հայազգի լեզվաբանին «սեփական հողակտորի վրա ապօրինի շինարարություն կատարելու» համար: Նիշանյանը, ով դատապարտվել էր երկու տարվա ազատազրկման, պատիժը հունվարի 2-ից կրում էր Իզմիր քաղաքի Թորբալը բանտում: Դատարանի թույլտվությամբ նա կարողացել էր մոտ մեկ շաբաթով դուրս գալ բանտից: Նրա որդին' Արսեն Նիշանյանը, հայտնել էր, որ հայրը երեք ամիսը մեկ հնարավորություն կունենա 3-4 օրով գտնվել ազատության մեջ: