Փետրվարի 24-ին՝ երգահան Դավիթ Հալաջյանի 50-ամյակին նվիրված համերգ

Հայաստանի պետական ֆիլհարմոնիկ նվագախումբը փետրվարի 24-ին հանդես կգա համերգային ծրագրով՝ նվիրված հայ անվանի երգահան Դավիթ Հալաջյանի 50-ամյակին: Ծրագրում կհնչի Հալաջյանի՝ «Missa de Lumine» 85 րոպե տևողությամբ մեսսան: Ֆիլհարմոնիկ նվագախմբի հետ համերգին հանդես կգա նաև Հայաստանի պետական կամերային երգչախումբը՝ Ռոբերտ Մլքեյանի ղեկավարությամբ: «Ես ուրախ եմ, որ բախտ ունենք կատարելու մի ստեղծագործություն, որն անձամբ ես շատ եմ սիրում, և որը գրված օրվանից «երջանիկ» ստեղծագործություն դարձավ, քանի որ անընդհատ կատարվում է», – համերգի կապակցությամբ հրավիրված մամլո ասուլիսին նշեց ֆիլհարմոնիկ նվագախմբի գեղարվեստական ղեկավար Էդուարդ Թոփչյանը։

Ինքը՝ հեղինակը, այս համերգին ներկայացվելիք մեսսան համարում է իր ստեղծագործությունների գագաթնակետերից մեկը։ «Կուզեի արտահայտել իմ մեծ ուրախությունը, որ իմ ստեղծագործությունը ներկայացվում է Հայաստանում, ինձ համար դա մեծ պատիվ է», – հանդիպման ընթացքում նշեց հեղինակը։ Հալաջյանի համար հայրենիքում իր գործերի ներկայացված լինելն ամենակարևորն է. նա անկեղծացավ, թե հայրենիքից է ուժ ստանում։ 

Նշենք, որ Դավիթ Հալաջյանը ծնվել է 1962-ին՝ Երևանում: Երաժշտական կրթությունն ստացել է Հայաստանում, այնուհետև շարունակել է ուսումը Շվեյցարիայում: Ապրում և ստեղծագործում է Ցյուրիխում: Դավիթ Հալաջյանը «Missa de Lumine» մեսսայի, կանտատների, ջութակի կոնցերտի, 2 լարային կվարտետների, նվագախմբային, կամերային և վոկալ գործերի, ինչպես նաև էլեկտրոնային երաժշտության հեղինակ է: Հալաջյանի ստեղծագործությունները հնչում են բազմաթիվ երկրների բեմերից և ռադիոկայաններից, հրատարակվում «Mühlirad Verlag» հրատարակչության կողմից (Շվեյցարիա):