Թուրքիայում Սևան Նիշանյանին տեղափոխել են փակ բանտ

Թուրքիայի հայտնի հայ լեզվաբան Սևան Նիշանյանի նկատմամբ հետապնդումները շարունակվում են: Ինչպես լեզվաբանը կանխագուշակել էր իր վերջին նամակներից մեկում, թուրքական «արդարադատությունը» որոշում է կայացրել նրան աքսորել Բուրջայի փակ բանտ: Այս մասին հայտնի է դարձել Նիշանյանի ֆեյսբուքյան էջից, որը նրա' բանտում գտնվելու ժամանակ վարում է որդին:

Իր վերջին նամակներից մեկում Նիշանյանը տեղեկացրել էր, որ վերջին հոդվածներից մեկի պատճառով իր դեմ հետաքննություն են սկսել' ծառայողներից մեկին նվաստացնելու մեղադրանքով: Բանտի տնօրենը նրան կանչել է իր մոտ, և հայ մտավորականից ցուցմունք են վերցրել: Նիշանյանի համոզմամբ` մի քանի օր հետո իրեն կարող են տեղափոխել փակ բանտ: «Իրական պատճառն այդ հոդվածը չէր: Ինչ եկել եմ այս բանտ, ասում են, թե այստեղի «խերը» կորել է: Գնամ, կկարողանան հանգիստ շունչ քաշել»,-ասել է Նիշանյանը:

Ավելի վաղ Նիշանյանը նամակ էր գրել լրագրող Հասան Ջեմալին, որով հայտնել էր, որ բանտում իրեն չեն վերաբերվում այնպես, ինչպես մյուս ազատազրկվածներին: Նրա խոսքով` «վերևից եկած կարգադրությամբ» ինքը խտրական վերաբերմունքի է ենթարկվում: Նամակում լեզվաբանը պատմել էր, որ բանտ գալու առաջին օրերին իրեն շատ լավ են վերաբերվել, հարգել են իր գրող լինելու հանգամանքը: Անգամ բանտապետը 2-3 անգամ հրավիրել է իր մոտ և զրուցել են, ինչից հետո իր իսկ ցանկությամբ նշանակել են բանտի գրադարանավարի պաշտոնում' խոստանալով համակարգիչ և համացանց տրամադրել, որպեսզի Նիշանյանը կարողանա աշխատել իր գրքի վրա:

Թուրքիայի արդարադատությունը մեղավոր էր ճանաչել հայազգի լեզվաբանին «սեփական հողակտորի վրա ապօրինի շինարարություն կատարելու» համար: Նիշանյանը, ով դատապարտվել էր երկու տարվա ազատազրկման, պատիժը հունվարի 2-ից կրում էր Իզմիր քաղաքի Թորբալը բանտում: Դատարանի թույլտվությամբ նա կարոտացել էր մոտ մեկ շաբաթով դուրս գալ բանտից: Նրա որդին' Արսեն Նիշանյանը, հայտնել էր, որ հայրը երեք ամիսը մեկ հնարավորություն կունենա 3-4 օրով գտնվել ազատության մեջ: