Համացանցում հայտնվել է Էրդողանի և որդու խոսակցության նոր ձայնագրություն

Թուրքիայի վարչապետ Ռեջեփ Թայիփ Էրդողանի և նրա որդու' Բիլալ Էրդողանի միջև հեռախոսազրույցի ձայնագրության տարածման հետ կապված սկանդալային ալիքը երկրում չի դադարում: Անհայտ օգտատերերի կողմից Youtube-ում տեղադրվել է ևս երկու ձայնագրություն, որոնցից մեկում հայր և որդի կրկին խոսում են մեծ գումարների մասին: Ինչպես հաղորդում է թուրքական Demokrathaber.net-ը, առաջին ձայնագրության մեջ կողմերը խոսում են ինչ-որ Ս. Ա. անունով գործարարից գումար վերցնելու մասին: Բիլալը հորը հայտնում է, որ գործարարը խոստացել է տալ 10 միլիոն ԱՄՆ դոլար, իսկ վարչապետը նրան ի պատասխան նշում է, թե «այն ինչ խոստացել է, կբերի: Բոլորը բերում են, նա ինչո՞ւ չպետք է բերի», ապա Էրդողանը հավելում է. «Մի անհանգստացիր, մեր գիրկը կընկնի»: Առաջին ձայնագրության վերջում հայտնի է դառնում նաև, որ վերոնշյալ գործարարը Բիլալ Էրդողանին վիլլա է նվիրել:

Երկրորդ ձայնագրությունը, որը հայտնվել է համացանցում, նշվում է, թե պարունակում է Էրդողանի փեսայի վստահված անձի և ինչ-որ գործարարի վստահված անձի խոսակցությունը: Նրանց զրույցից պարզ է դառնում, որ Էրդողանն իր տանից «Մեծ կաշառք» գործողության և ձերբակալություններից հետո սկսել է հապշտապ դուրս հանել գումարները:

Վերջին զրույցի ժամանակ Բիլալը հորը հայտնել է, որ տանը դեռևս մնացել է 30 միլիոն եվրո, որը նա կտեղափոխի մեկ այլ վայր: Ձայնագրությունը լուրջ իրարանցում է իրականացրել երկրում: Վարչապետի գրասենյակը հայտարարել էր, որ իրականում ժապավենը մոնտաժի արդյունք է: Ընդդիմադիր կուսակցությունները պահանջել էին Էրդողանի հրաժարականը: