Էրդողանի և որդու միջև հեռախոսային խոսակցության ձայնագրության մոնտաժված լինելը չի հաստատվել

Թուրքիայի վարչապետ Ռեջեփ Թայիփ Էրդողանի և ավագ որդու' Բիլալ Էրդողանի սկանդալային հեռախոսազրույցի' համացանցում հայտնված ձայնագրությունների մոնտաժված լինելը չի հաստատվել: Այս մասին հայտնում են թուրքական ԶԼՄ-ները, համացանցում հեռախոսային խոսակցությունների հայտնվելուց անմիջապես հետո Էրդողանի շրջապատը հայտարարել էր, որ ձայնագրություններն ուղարկվել են ամերիկյան առաջատար John Marshall Media և Kaleidoscope Sound ձայնագրման ստուդիաներ' պարզելու նրանց իսկական լինելը: Որոշ ժամանակ հետո հայտարարվել էր, թե հիշյալ ընկերություններն իբրև հաստատել են ձայնագրությունների մոնտաժված լինելը:

Սակայն, վերոնշյալ ընկերություններն այսօր հանդես են եկել պատասխան հայտարարությամբ այն մասին, որ այդ ձայնագրությունների վերաբերյալ փորձագիտական գնահատական չեն տվել: Ընկերությունները նաև դատապարտել են Թուրքիայի վարչապետի շրջապատին, որ սուտ տեղեկություններ է տարածում' քողարկվելով հեղինակավոր փորձագետների անվան տակ:

Օրերս համացանցում տարածված ձայնագրություններում Թուրքիայի վարչապետը որդուն' Բիլալին հանձնարարում է շտապ կերպով տանից դուրս բերել մոտ մեկ մլրդ դոլար կանխիկ գումարը և փոխանցել այն որոշ բիզնեսմենների: Որդին պատասխանում է, որ մնացել է ընդամենը 30 մլն եվրո, որը նույնպես դուրս կբերի տանից: Մյուս ձայնագրությունում էլ Էրդողանը Բիլալին հանձնարարում է, որպեսզի զբաղվի նաև եղբոր և քրոջ տներում եղած կանխիկ խոշոր գումարները ապահով վայրում թաքցնելու գործով: