Հայաստանում Հնդկաստանի դեսպանն առաջարկել է հեռաբժշկության համատեղ ծրագրեր իրականացնել

ՀՀ առողջապահության նախարար Հարություն Քուշկյանն ընդունել է Հայաստանում Հնդկաստանի արտակարգ և լիազոր դեսպան Աչալ Կումար Մալհոտրային և դեսպանատան աշխատակազմի ղեկավար Փանկաջ Սաքսենային:

Ողջույնի խոսքեր փոխանակելուց հետո դեսպանը նախարարին է ներկայացրել երկուստեք համագործակցությունը խթանող առաջարկներ: Մանավորապես` քննարկվել է «Հայաստանի Հանրապետության կառավարության և Հնդկաստանի Հանրապետության կառավարության միջև առողջապահության և բժշկագիտության բնագավառներում համագործակցության մասին» համաձայնագրի կնքման հնարավորությունը, որի լրամշակված տարբերակը ներկայումս գտնվում է վերջնական փոխհամաձայնեցման փուլում:

Դեսպանն առաջարկել է նաև հեռաբժշկության համատեղ ծրագրեր իրականացնել, փորձի փոխանակման նպատակով կազմակերպել փոխայցելություններ:

Նա նշել է, որ 2011 թվականին Հնդկաստանի Դեղամիջոցների արտահանման խթանման խորհրդի (PHARMEXCIL) կողմից Հայաստան գործուղված աշխատանքային պատվիրակության այցի շրջւանակներում կազմակերպվել են հանդիպումներ ՀՀ առողջապահության նախարարության, ՀՀ ԱՆ դեղերի և բժշկական տեխնոլոգիաների փորձագիտական կենտրոնի պատասխանատու անձանց, ինչպես նաև հայկական դեղագործական կազմակերպությունների ներկայացուցիչների հետ: Կարևորելով դեղագիտության բնագավառում հնդկական կողմի հետ փոխշահավետ համագործակցության ծավալման հնարավորությունները՝ այցի ընթացքում Հայաստանի դեղարտադրողների և ներմուծողների միության և Հնդկաստանի Դեղամիջոցների արտահանման խթանման խորհրդի միջև համագործակցության հուշագիր կնքելու պայմանավորվածություն է ձեռք բերվել:

Հարություն Քուշկյանը կարևորել է առաջարկված բոլոր ծրագրերը և պատրաստակամություն հայտնել համագործակցությունը զարգացնելու: