Լիտվացի կինեմատոգրաֆիստները ցանկություն են հայտնել խաչքարի մասին ֆիլմ նկարահանել

ՀՀ մշակույթի նախարար Հասմիկ Պողոսյանն ընդունեց ՀՀ-ում Լիտվայի Արտակարգ և լիազոր դեսպան Գեդրիուս Ապուոկասին: Հանդիպմանը կողմերը շնորհավորեցին միմյանց ս. թ. հունվարի 26–ին «Հայաստանի Հանրապետության Կա­ռա­վարության և Լիտվայի Հանրապետության Կառավարության միջև մշակույթի բնագավառում համագործակցության մասին» համաձայնագրի ստորագրման առթիվ, փաստեցին որ այն նոր հնարավորություններ ու հորիզոններ կբացի մշակութային երկկողմ համագործակցության համար և անդրադարձան ընթացիկ տարվա խնդիրներին:

Նախարար Հասմիկ Պողոսյանը դեսպանին մասնավորապես ծանոթացրեց մեր երկրի համար կարևորագույն՝ Երևանը գրքի 2012 թ. համաշխարհային մայրաքաղաքի և հայ գրատպության 500-ամյակի ծրագրերին, առաջարկեց մասնակցություն ունենալ այդ առթիվ նախատեսվող տոնական միջոցառումներին, ինչպես նաև՝ այլ երկրների շարքում հանդես գալ լիտվական տպագիր առաջին գրքերի երևանյան ցուցադրությունով:

Դեսպան Գեդրիուս Ապուոկասը շնորհակալություն հայտնեց նախարարին տոնակատարություններին մասնակցելու հրավերի համար, խոստացավ աջակցություն ցուցաբերել և ապրիլի 21-ին մեկնարկող «ArmBookExpo» հայ գրքի ցուցահանդեսին տրամադրել հայերի ու Հայաստանի մասին լիտվերեն հրատարակված գրականություն: Նախարար Հասմիկ Պողոսյանը և դեսպան Գեդրիուս Ապուոկասը անդրադարձան 2012 թ. ընթացքում իրականացվելիք այլ ծրագրերի ևս: Դեսպանը տեղեկացրեց, որ լիտվացի կինեմատոգրաֆիստները ցանկություն են հայտնել խաչքարի մասին ֆիլմ նկարահանել և խնդրեց այդ հարցում նախարարության աջակցությունն ու խորհրդատվությունը: Համաձայնություն ձեռք բերվեց նաև երևանյան զբոսայգիներում լիտվական փողային կվինտետի՝ «Վիլնյուս-բրաս-բենդի» և հայկական փողային նվագախմբերի համատեղ բացօթյա համերգների անցկացման վերաբերյալ: Հանդիպման ավարտին նախարար Հասմիկ Պողոսյանը դեսպանին տեղեկացրեց, որ փետրվարի 29-ից Հայաստանում մեկնարկելու է «Արմմոնո» միջազգային թատերական փառատոնը, որին մասնակցելու է նաև լիտվացի անվանի դերասան Ռեգիմանտաս Ադո­մայտիսը և հրավիրեց ներկա գտնվելու արտիստի ստեղծագործական երեկոյին: