«Չորրորդ ինքնիշխանություն». Կառավարությունում поумнели

Երեկ ՀՀ կառավարության պաշտոնական կայքում ուշագրավ տեղեկություն է զետեղվել, համաձայն որի՝ ՀՀ Վարչապետ Տիգրան Սարգսյանը գրությամբ դիմել է ՀՀ Ազգային ժողովի նախագահ Սամվել Նիկոյանին՝ լրամշակման նպատակով հետ վերադարձնել ԱԺ-ի կողմից առաջին ընթերցմամբ ընդունված «Արտակարգ դրության իրավական ռեժիմի մասին» Հայաստանի Հանրապետության օրենքի նախագիծը: Հիշեցնենք, որ այս օրենքի քվեարկության ժամանակ էր, որ այլոց կոճակներ էին սեղմել հիմնականում ՀՀԿ–ական Տիգրան Սարգսյանի կուսակցական գործընկերները՝ պատգամավորներ Հերմինե Նաղդալյանը, Ռազմիկ Զոհրաբյանը, Գագիկ Մելիքյանը, Արեգ Ղուկասյանը եւ այլն։

Եվ մինչ Հայ Ազգային Կոնգրեսը, հասարակական եւ իրավապաշտպան տարբեր կազմակերպություններ հայտարարում էին, որ «Արտակարգ դրության իրավական ռեժիմի մասին» օրենքի նախագիծը պարունակում է հակասահմանադրական դրույթներ (օրինագիծը հակասահմանադրական է, քանի որ ենթադրում է արտակարգ դրության պայմաններում զինված ուժերի ներգրավման հնարավորություն, մինչդեռ ՀՀ Սահմանադրությամբ արգելված է նման մոտեցումը), խորհրդարանն առաջին ընթերցմամբ ընդունեց օրենքն այս տարվա առաջին քառօրյայում՝ 64 կողմ, 7 ձեռնպահ, 0 դեմ ձայների հարաբերակցությամբ։

Երեկ ՀԱԿ իրավական հանձնախմբի ղեկավար Գագիկ Ջհանգիրյանին խնդրեցինք մեկնաբանել, թե ի՞նչ է նշանակում կառավարության հետ քայլը։ Վերջինս մեկ բառով բնութագրեց գործադիրի քայլը՝ «Поумнели»: