Էրդողանը հայտարարել է քաղաքականությունից հեռանալու մասին

Թուրքիայի վարչապետ Ռեջեփ Թայիփ Էրդողանը հայտարարել է քաղաքականությունից հեռանալու իր պատրաստակամության մասին այն դեպքում, եթե իր գլխավորած' իշխող «Արդարություն և զարգացում» կուսակցությունը չհաղթի տեղական ինքնակառավարման մարմինների ընտրություններում: Այս մասին հայտնում են թուրքական ԶԼՄ-ները:

«Հայտարարում եմ ուղղակի և բաց. եթե ԱԶԿ-ն առաջինը չլինի այդ ընտրություններում, ես պատրաստ եմ հեռանալու քաղաքականությունից»,-ասել է Էրդողանը:

Թուրքիայում տեղական ինքնակառավարման մարմինների ընտրությունները պետք է տեղի ունենան 2014 թ. մարտի 30-ին: Ենթադրվում է, որ ընտրություններում հիմնական պայքարն ընթանալու է ԱԶԿ-ի և գլխավոր ընդդիմադիր Ժողովրդահանրապետական կուսակցության միջև:

Երկու ամիս առաջ թուրքական իրավապահ մարմինների կողմից անցկացված գործողությունների արդյունքում բացահայտվել էր Էրդողանի, նրա որդիների, կառավարության անդամների' խոշոր ծավալների հասնող կոռուպցիոն գործարքները: Այդ փաստերն արտացոլող հեռախոսային զրույցների ձայնագրությունները համացանցում հայտնվելուց հետո, իշխող կուսակցության և, հատկապես' Էրդողանի հեղինակությունն ու վարկանիշը Թուրքիայում խիստ ընկել է:

Համացանցում հայտնված հեռախոսային խոսակցությունների ձայնագրություններում Էրդողանը հանձնարարում է իր ավագ որդուն ոստիկանությունից թաքցնել Ստամբուլի տանը պահված տասնյակ միլիոնավոր դոլարի կանխիկ գումարը: Այդ ցնցող բացահայտումը պատճառ դարձավ Թուրքիայում համատարած կոչերի' Էրդողանի հրաժարականի պահանջով:

Թուրքիայում բացահայտված կոռուպցիոն սկանդալը կարող է վերջ դնել Էրդողանի քաղաքական կարիերային, և նա կարող է կորցնել ոչ միայն վարչապետի իր պաշտոնը և մոտ ապագայում նախագահ դառնալու հնարավորությունը, այլև կարող է իր հանցագործությունների համար ենթարկվել երկարատև ազատազրկման: