Կիրգիզիայում ընտրակեղծիքները շարունակվում են անգամ ընտրատարածքների փակվելուց հետո

Կիրգիզիայում Ավարտվել են նախագահական ընտրությունները։

Նախնական արդյունքներով ընտրությունների արդյունքում առաջատարն է վարչապետ Ալմազ Ատամբաևը։ 2318 ընտրատարածքներից 33–ի նախնական հաշվարկների արդյունքում նա ստացել է ընտրողների 74,49%-ի աջակցությունը։

Երկրորդ տեղում է Արտակարգ իրավիճակների նախկին նախարար, «Աթա–Ժուրտ» (Հայրենիք) կուսակցության ղեկավար Կամչիբեկ Տաշիեվը՝ որն ստացել է ընտրողների ձայների 12.95%-ը։ Իսկ Տաշիևին հաջորդում է կիրգիզական խորհրդարանի նախկին խոսնակ Ադախան Մադումարովը՝ ձայների 7.73%–ով։

Ընտրողների մնացած մասին ձայները կիսվել են մյուս 13 թեկնածուների միջև։

Ընդհանուր առմամբ ընտրություններին մասնակցել է ընտրելու իրավունք ունեցող քաղաքացիների 51.96%-ը (1,534 մլն. մարդ)։

Երկրի իշխանությունների պնդմամբ՝ ընտրություններն անցել են առանց լուրջ խախտումների։ Սակայն տրամագծորեն հակառակ կարծիքն են արտահայտում իրավապաշտպաններն ու ընդդիմադիր թեկնածուները։

Ընտրությունների ընթացքում պարզվել է, որ շատ ընտրողների անուններ չկան ընտրացուցակներում։ Այս մասին բարձրացված աղմուկից որոշ ժամանակ անց, Կիրգիզստանի ԿԸՀ–ի ներկայացուցիչները հայտարարել են, որ անճշտությունները շտկված են։ Սակայն որոշ իրավապաշտպաններ պնդում են, որ այդ «շտկումնեը» ևս ծառայեցվել են ընտրակեղծիքներին։

Կիրգիզստանի նախագահական ընտրությունների մոնիթորինգով զբաղվող խմբի անդամ Իվան Յանուշկեվիչը «Ռեգնում» լրատվական գործակալությանը հայտնել է, որ ընտրություններն անցել են բազմաթիվ կեղծիքներով Ֆիքսվել են քվեաթերթիկների լցոնման բազմաթիվ դեպքեր, և կեղծարարությունները շարունակվում են նույնիսկ ընտրատարածքների փակվելուց հետո։

Ավելի վաղ ԶԼՄ–ները հաղորդել էին, որ կրակոցներ են հնչել Ջալալ–Աբադ քաղաքի ընտրատարածքներից մեկում։

«Ռեգնում» լրատվական գործակալությանը նաև ինֆորմացիա էր տարածել, որ Կիրգիզիայի վարչապետի պաշտոնակատար Օմուրբեկ Բաբանովը ընտրությանը մասնակցել է առանց անձնագրի։

«Ոչ ոք, երևի չի կասկածում, որ ես՝ ես եմ»,– միջազգային դիտորդներին է դիմել Բաբանովը՝ պատճառաբանելով, որ անձնագիրը մեքենայում է մոռացել։ Ստանալով դիտորդների հավանությունը բաբանովը լրացրել է քվեաթերթիկը և տվել իր աղջկան, վերջինս էլ այն գցել է քվեատուփի մեջ։ Ավելի ուշ վարչապետի օգնականները բերել են նրա անձնագիրը և ընտրական հանձնաժողովի անդամները լրացրել են նրա անձնական տվյալները։

«ԿիրՏԱԳ» լրատվական գործակալության փոխանցմամբ՝ ըտնրական օրենսգրքի խախտմամբ է քվեարկել նաև Օշ քաղաքի քաղաքապետ Մելիսբեկ Միրզակմատովը։ Նա հրաժարվել է ընտրական օրենսգրքով սահմանված մատնանշումից։

«Ես թույլ չեմ տա իմ ձեռքին մատնանշում անել։ Սա մարդու իրավունքների խախտում է։ Ես չեմ ուզում մատներս ներկել կասկածելի ծագմամբ հեղուկով»,– ասել է Կիրգիզիայի հարավային մայրաքաղաք համարվող Օշ քաղաքի քաղաքապետը։

Հիշեցնենք, որ Կիրգիզիայում նախագահական ընտրություններն սկսվել են այսօր՝ տեղական ժամանակով ժամը 8։00 (Երևան՝ 7։00)։ Այս ընտրությունների արդյունքում առաջին անգամ Կիրգիզիայի հանրապետության պատմության մեջ նախագահական աթոռը կփոխանցվի ընտրությունների միջոցով։