Այսօր ավելի քան հարյուր ֆիլմում նկարահանված Օլեգ Յանկովսկու ծննդյան 68-ամյակն է

«Լավ դերասանը չի կարող «կես ոտքով խաղալ», սա տարիքից կախված չէ. դերասանը պետք է էներգիա ճառագի։ Դու դուրս ես գալիս բեմ և սկսում են այլ կերպ աշխատել քո փայծախը, լյարդը, նյարդային համակարգը…»,– ասել է Օլեգ Յանկովսկին։ Կինոյի և թատրոնի խորհրդային հայտնի դերասան Օլեգ Յանկովսկին ծնվել է 1944-ին՝ Ղազախստանի Ջեզկազգան բնակավայրում: Նրա հայրը Սեմյոնովյան գվարդիայի սպա էր, որին խորհրդային տարիներին բռնադատել էին, իսկ ընտանիքին՝ աքսորել Ղազախստան: Մայրը, վախենալով դաժան տարիների ձերբակալությունից, այրել է ընտանեկան բոլոր լուսանկարները, որոնք վկայում էին Յանկովսկիների ազնվական ծագման մասին:

Ընտանիքի միայնակ մայրը, հասարակ հաշվապահի իր աշխատավարձով կերակրել է երեք որդիներին և իր մորը։ Յանկովսկիներն ունեցել են հսկայական գրադարան, սովորել են օտար լեզուներ։ Որոշ ժամանակ անց նրանց ընտանիքը տեղափոխվել է Սարատով։ Եղբայրներից ավագը դերասան էր Մինսկի ռուսական թատրոնում։ Նա թատրոնի փորձերին իր հետ տանում էր նաև 14-ամյա Օլեգին։ Հենց այստեղ էլ կրտսեր Յանկովսկին ստացել է իր առաջին դերը։ Վերադառնալով Սարատով՝ նա սովորել է Սարատովյան թատրոնի դպրոցում, իսկ հետո աշխատել է տեղի Դրամատիկական թատրոնում, որտեղ նրան սկզբնական շրջանում բաժին են ընկել միայն էպիզոդիկ դերեր։

Մի անգամ, երբ Դրամատիկական թատրոնը ժամանում է Լվով, այնտեղ դերասանին նկատում է Վլադիմիր Բասովը, ով էլ հետագայում դառնում է Յանկովսկու դերակատարմամբ «Վահան և հզորություն» ֆիլմի ռեժիսորը։ Ֆիլմում Օլեգը ստացավ Հենրիխ Շվարցկոփի դերը։ Այս ֆիլմի շնորհիվ դերասանը սկսեց ժողովրդականություն վայելել։ Թատրոնում և ֆիլմերում նրան առաջարկվում էին ամենատարբեր դերեր։ Հայտնի են նրա դերերը Ա. Տարկովսկու «Հայելի», «Նոստալջի», Մ. Շվեյցերի «Իմ քնքուշ ու նուրբ գազան», Է. Լոտյանի «Սովորական հրաշք», «Այդ նույն Մյունհաուզենը» և այլ ֆիլմերում։

Յանկովսկին խաղացել է ավելի քան 100 դեր մինչև կյանքի վերջ. սիրված դերասանն ու ռեժիսորը կյանքից հեռացավ 2009-ին՝ ծանր հիվանդության պատճառով։ Սիրված դերասանի հուղարկավորությանը ներկա էին հազարավոր մարդիկ։ Նա թաղված է Նովոդեվիչյան գերեզմանատանը։