«Պետությունն առաջարկում է կուտակել թոշակը, բայց կուտակողին թալանում է»

Բագրատ Հարությունյանը ֆեյսբուքյան իր էջում գրում է.

«Պետությունն առաջարկում է կուտակել թոշակը, բայց կուտակողին թալանում է...

Բացատրեմ եղելությունը և խնդրեմ, բոլոր նրանց, ովքեր այս հարցում կարող են օգնել, միջամտեն:

Ուրեմն, մի կենսաթոշակառու կին, կարծելով, որ եթե իր գումարները գտնվում են բանկում, ապա դրանք ապահով են, համաձայնում է թոշակ ստանալ քարտով և հավաքել գումարը բանկում (բարեբախտաբար, թոշակով չի ապրում): Օրերս որոշում է տեսնել որքան գումար ունի կուտակված պարզում է, որ ... չունի: Գնում է բանկ, վերցնում քաղվածք (ինչի համար առանձին վճար են գանձում նրանից, ինչը կարծում եմ սխալ է, քանի որ դա ևս հաշվի սպասարկման մաս է) և պարզում, որ պետությունը պարզապես կենսաթոշակ չի վճարել: Գնում է համապատասխան մարմին և տեղեկանում է, որ եթե թոշակառուն մեկ տարի գումար չի կանխիկացնում, նրա թոշակի վճարումը դադարեցվում է, իսկ այն բանից հետո, երբ պարզ է դառնում, որ թոշակառուն մահացած չէ, երկրից չի բացակայել և այլն, այլ պարզապես որոշել է գումարը կուտակել վճարում են խնդիրը հայտնաբերելու և դիմումը տալու պահից վերջին 12 ամիսների գումարը:

Կոնկրետ անձի դեպքում թոշակառուն կորցնում է 9 ամսվա թոշակ, մոտ 35000 դր. ամսեկան:

ՀՀ ԱՍՀՆ Կենսաթոշակային ապահովության վարչություն աշխատակիցը հեռախոսով պարզաբանում է, որ դա կարգ է և չի հերքում, որ պետությունն օրենքով թալանում է թոշակառուներին, առաջարկելով դիմել դատարան, թեև զգուշացնում է, որ դատարանը հիմվելու է այդ նույն կարգի վրա և որևէ բանով թոշակառուին չօգնի:

Նման բանը պարզապես ապշեցուցիչ է:»