Գործնական քայլեր սոցիալական փաթեթի կիրարկման ուղղությամբ

Երևանի թիվ 114 ավագ դպրոցում այսօր կազմակերպվել է աշխատանքային խորհրդակցություն, որը վարել է ՀՀ կրթության և գիտության նախարարություն աշխատակազմի ղեկավար Մհեր Ղազարյանը: Այս մասին ասված է ՀՀ ԿԳՆ պաշտոնական կայքում տեղադրված հաղորդագրության մեջ: Հանրապետության ավագ և հատուկ դպրոցների, ինչպես նաև ուսումնարանների տնօրենների մասնակցությամբ քննարկվել են ՀՀ կառավարության կողմից հաստատված սոցիալական փաթեթի ծրագրի ներդրմանը վերաբերող հարցեր: ՀՀ կառավարության կողմից սահմանված կարգի համաձայն՝ սոցիալական փաթեթի ծրագիրն ուժի մեջ է մտել այս տարվա սկզբից:

ՀՀ ԿԳՆ աշխատակազմի ղեկավարը, ընդգծելով, որ սոցալական փաթեթի գաղափարախոսությունը բխում է կառավարության սոցիալական քաղաքականության նպատակներից, նշել է, որ շահառուների ցանկում ընդգրկված են հանրապետության ավագ, հատուկ դպրոցների, ինչպես նաև ուսումնարանների մանկավարժական աշխատողները: Յուրաքանչյուր շահառուի համար նախատեսված է 132 հազար դրամ՝ համաձայն դրույքաչափի: Սոցիալական փաթեթը կարող է ծախսվել 4 ուղղություններով՝ առողջապահական ապահովագրություն, կրթություն, հանգստի կազմակերպում և հիփոթեքային վարկավորում: Նշված ծառայություններից առողջապահական ապահովագրությունը պարտադիր է, որի դիմաց սոցփաթեթից կհատկացվի 52 հազար դրամ, մնացած 80 հազար դրամը շահառուն կարող է օգտագործել իր հայեցողությամբ: «Մեր ակնկալիքը ձեզանից հետևյալն է՝ բոլորդ պետք է դառնաք այս ծրագրի տերն ու կատարողը, որովհետև կրթական հաստատություններում ծրագրի արդյունավետության պատասխանատուն դուք եք»,- դիմելով ներկաներին՝ նշել է Մ. Ղազարյանը և հավելել, որ ծրագրի արդյունավետության կարևոր նախապայմանը հաշվապահական գրագիտությունն է: Խորհրդակցության ընթացքում ՀՀ ԿԳՆ համապատասխան ստորաբաժանման պատասխանատուները պատասխանել են ներկաներին հետաքրքրող հարցերին: