Ազգային ժողովը խորհրդարանական լսումներ է հրավիրում «ֆեյքերին» առնչվող օրինագծի վերաբերյալ

«Քաղաքացիական օրենսգրքում լրացումներ կատարելու մասին» ՀՀ օրենքի նախագծի վերաբերյալ ՀՀ Ազգային ժողովի պետական-իրավական հարցերի մշտական հանձնաժողովը կազմակերպում է խորհրդարանական լսումներ: Այս մասին ֆեյսբուքյան իր էջում գրառում է կատարել ՀՀ ԱԺ ՀՀԿ խմբակցության պատգավոր, նախագծի համահեղինակ Արփինե Հովհաննիսյանը' ամփոփելով մինչ այս եղած կարծիքները և տեսակետները: Նրա խոսքով' նախագծի վերաբերյալ առաջին իսկ պահից ստեղծվել է սխալ պատկերացում: «Այն ստացավ «ֆեյքերի դեմ» ոչ պաշտոնական անվանումը, որը, սակայն, ոչ մի աղերս չունի իրականության հետ: Խնդրում ենք, ուշադրությամբ կարդալ նախագծի դրույթները և կտեսնեք, որ ԶԼՄ-ի համար պատասխանատվություն սահմանող որևէ դրույթ այդ առումով չկա: Այդ պատասխանատվությունը նախատեսված է այսօր գործող օրենքում: Ուստի, այստեղից բխող բոլոր հարցադրումները չեն վերաբերում նախագծին»,-գրել է պատգամավորը' նշելով, որ հեղինակների մտադրությունների մասին ևս ստեղծվել է սխալ պատկերացում: «Որևէ անձնական շահագրգռվածություն նախագծի համահեղինակներից և ոչ մեկը չունի: Պարզապես առկա էին որոշ մտահոգություններ, որոնք բազմաթիվ անգամներ հնչեցվել են, այդ թվում' նաև լրատվամիջոցների կողմից, և այժմ փորձ է արվում որոշ հստակեցումներ մտցնել: Վստահ եմ' որևէ մեկը չի առարկում, որ այս դաշտում առկա են որոշակի խնդիրներ, որոնք մտահոգում են շատերին: Այս օրինագիծը շատ լավ առիթ է խոսելու, մտահոգությունները բարձրաձայնելու և համատեղ լուծումներ որոնելու համար,-նշել է Արփինե Հովհաննիսյանը:

Նրա պնդմամբ' անհասկանալի է, թե ինչպես կարող է գոյություն ունեցող կարգավորումը դիտվել ԶԼՄ-ի շահերին դեմ դեռևս նախագծի փուլում գտնվող կարգավորման միջոցով: «Երբ հնչում են փաստարկներ, որ այդ կարգավորումները կան և դրա անհրաժեշտությունը չկա, այդ դեպքում անհասկանալի է դառնում նույն անձանցից հնչող մյուս փաստարկը, որ սա ուղղված է ԶԼՄ-ների դեմ: Նախագիծը ընդամենը ամփոփել է միջազգային լավագույն դատական պրակտիկան' փորձելով հստակ սահմանել որոշ դրույթներ' ապահովելով իրավական կանխատեսելիության սկզբունքի իրացումը»,-գրել է պատգամավորը:

Նրա հավաստմամբ' նախագծի որևէ դրույթ չի հավակնում դոգմատիկ ճշմարտություն դառնալ, սյն պետք է դառնա քննարկման առարկա, և կարող է լրամշակվել ԶԼՄ-ների հետ քննարկումների արդյունքում: Լսումներին հրավիրվելու են նաև միջազգային կազմակերպությունների ներկայացուցիչները:

Արփինե Հովհաննիսյանը խորհուրդ է տալիս բոլոր շահագրգիռ անձանց մասնակցել լսումներին և ներկայացնել իրենց առաջարկությունները:
«Այս պահին արդեն ստացվել են բազմաթիվ առաջարկություններ, որոնք նախագծի հեղինակների կողմից դարձել են և կդառնան քննարկման առարկա: Լսումները առավել արդյունավետ դարձնելու համար, խնդրում ենք բոլոր այդ առաջարկությունները ուղարկել նաև նախագծի համահեղինակներին, որոնք կամփոփվեն լսումների ընթացքում»,-եզրափակել է պատգամավորը: