Հիլարի Քլինթոնը սիրիացի ապստամբներին զինվելու կոչ է արել

ԱՄՆ պետքարտուղար Հիլարի Քլինթոնը հինգշաբթի ընդդիմությանը և սիրիացի ապստամբներին զինվելու կոչ է արել՝ ավելացնելով, որ նրանք պետք է աշխատեն միայն նախագահ Բաշար Ասադին իշխանությունից զրկելու ուղղությամբ, հաղորդում է MIGnews–ը։

Ըստ Քլինթոնի, Ասադի վարչակարգն այժմ հսկայական ճնշումների է ենթարկվում։ Նա նշել է, որ իշխանությունները հասկանում են երկրում փոփոխությունների անխուսափելիությունը։

Պետքարտուղարը նաև նշել է, որ Սիրիայի իշխանությունները երկրից փախչելու ելքեր են փնտրում, իրենց ընտանիքների անդամներին ուղարկում այլ երկրներ և նույնիսկ հսկայական գումարներ են երկրից դուրս հանում։ 

«Ընդդիմադիր ուժերը պետք ավելի արդյուավետ գործեն։ Ինձ համար պարզ է, որ անխուսափելիորեն շրջադարձային փոփոխություններ պետք է լինեն այդ երկրում, և ցանկանում եմ, որ դա տեղի ունենա շատ արագ, որպեսզի զոհերի թիվն այլևս չավելանա։ Հույս ունեմ, որ ապստամբները միջոցներ կգտնեն պաշտպանվելու և հարձակողական գործողություններ սկսելու համար», – ասել է Քլինթոնը։

ԱՄՆ-ը, մինչև վերջերս հայտարարում էր, որ  կողմնակից է Սիրիայի ճգնաժամի միայն խաղաղ կարգավորմանը և խնդիրը ապստամբական ուժերին զինելու ճանապարհով լուծելու նպատակ չունի։  

Երեքշաբթի, պետքարտուղարության խոսնակ Վիկտորիա Նուլանդը հայտարարել էր, որ «ԱՄՆ–ն Սիրիայի հարցը երկարատև ռազմական ճանապարհով հարցը կարգավորելու միտում չունի»։ 

«Սակայն, եթե մեզ չհաջողվի ճնշումների ճանապարհով Ասադին իշխանությունից զրկել, ապա մենք լրացուցիչ միջոցներ կձեռնարկենք», – ասել է Նուլանդը՝ չմանրամասնելով իր խոսքը։