Հայ երգիչն Ադրբեջան ոտք չպիտի դնի. Նունե Եսայան, Հասմիկ Կարապետյան

Հասարակության շրջանում, մասնավորապես՝ սոցցանցերում, ակտիվ քննարկումներ են ծավալվել հայ աստղերի կողմից «Եվրատեսիլ-2012»-ը բոյկոտելու վերաբերյալ։ Որոշ ֆեյսբուքցիներ հայ աստղերի քայլը համարում են «Եվրատեսիլ-2012»-ի պոտենցիալ մասնակցի՝ «Դորիանս» խմբի մենակատար Գոռ Սուջյանի դեմ ուղղված քայլ։

Մեկնաբանություններ ստանալու ակնկալիքով Լուրեր.com–ի թղթակիցը զրուցեց երգչուհիներ Նունե Եսայանի և Հասմիկ Կարապետյանի հետ։

««Եվրատեսիլ-2012» –ի պոտենցիալ մասնակցի՝ Գոռ Սուջյանի մասին բավականին բարձր կարծիք ունեմ. նա Հայաստանի լավագույն վոկալիստներից է, մեր բոյկոտը վերաբերում է կոնկրետ երևույթին. Ադրբեջան հայ երգիչ ոտք չպիտի դնի»,- ասաց Նունե Եսայանը։

Հասմիկ Կարապետյանն իր հերթին նշեց, որ ինքն առաջին մարդն է եղել, որ «Եվրատեսիլ-2012»-ին մասնակցության հայտ ներկայացրած երգիչներից քվեարկել է հենց «Դորիանսի» օգտին։

««Եվրատեսիլ-2012»-ին Հայաստանի մասնակցության հարցի վերաբերյալ քննարկումներին բազմիցս նշել եմ, որ Հայաստանի ներկայությունը Բաքվում կայանալիք մրցույթին ճիշտ չի լինի։ Առավել ևս, որ Ադրբեջանից լուրեր էին հասել այն մասին, թե «Բաքուն հայ մասնակցին ողջ բաց չի թողնի»»,– ասաց երգչուհին։

Անդրադառնալով ֆեյսբուքցիների այն հարցադրումներին, թե ինչո՞ւ է «Եվրատեսիլ-2012»-ը հիմա բոյկոտվում, երբ գրեթե ամեն շաբաթ ադրբեջանցիների դիպուկահարներից հայ զինվորներ են մահանում, երգչուհին պատասխանեց. «Նախկինում մրցույթը չենք բոյկոտել, քանի որ հույսեր էինք փայփայում, թե մրցույթին հայ մասնակցի անվտանգությունն ապահովված կլինի: Վերջին դեպքից հետո այս հույսերը վերջնականապես հօդս ցնդեցին»։

Հիշեցնենք, որ երեկ երեկոյան հայ երգիչները հանդես են եկել «Եվրոպական հեռարձակողների միությանը» և «Հայաստանի Հանրային հեռուստաընկերությանն» ուղղված հայտարարությամբ, որով հրաժարվում են մասնակցել Բաքվում կայանալիք «Եվրատեսիլ 2012» երգի մրցույթին: 

Հատկանշական է, որ Epress.am-ին տված հարցազրույցում «Դորիանս» խմբի պրոդյուսեր Վահագն Գևորգյանը հայտնել է, որ խումբը չի փոխել իր դիրքորոշումն այս տարի Բաքվում կայանալիք «Եվրատեսիլ» երգի մրցույթի առնչությամբ և պատրաստ է Հայաստանը ներկայացնել Ադրբեջանի մայրաքաղաքում, եթե Հանրային հեռուստատեսությունը որոշում կայացնի մասնակցել մրցույթին:

Անդրադառնալով մրցույթին չմասնակցելու հիմնավորմանը՝ Ալբերտ Ադիբեկյանի մահվան հանգամանքին, Վահագն Գևորգյանն ասել է. «Ամենատխուրն այն է, որ երեկվա զինվորի մահը կապվել է «Եվրատեսիլի» հետ և ավելի մեծ աղմուկ բարձրացրել, քան շատ այլ զինվորների մահերը: Մենք հիմա չէ, վաղուց պետք է մտածեինք՝ որն է բանակում մահերի պատճառը՝ ով է մեղավոր, որ զինվորները սպանվում են: Իհարկե, ասում են՝ ադրբեջանցիները, բայց չեմ կարծում, որ մեր բանակում ներքին խնդիրներ չունենք»,- ասել է Գևորգյանը: