Ո՞րն է Կոնգրեսի հաջորդ քայլը. հարցազրույց Լևոն Զուրաբյանի հետ

Լուրեր.com-ի զրուցակիցն է Հայ Ազգային Կոնգրեսի համակարգող Լևոն Զուրաբյանը:

Պարոն Զուրաբյան, մի հարց ունեմ` կապված ՀՀՇ փոխնախագահ Սամվել Աբրահամյանի այսօրվա հայտարարության հետ, որում նա մասնավորապես նշել է, որ ՀԱԿ-ը պատրաստվում է առաջիկա խորհրդարանական ընտրություններն օգտագործել իր նպատակին հասնելու` Սերժ Սարգսյանին հրաժարական պարտադրելու ու երկրում սահմանադրական կարգը վերականգնելու համար: Ըստ նրա, այդ նպատակին հասնելու մեխանիզմների շուրջ ՀԱԿ-ում քննարկումներ են ընթանում: Ի՞նչ մեխանիզմների մասին է խոսքը, ի՞նչ պետք է հասկանալ դրա տակ: 

-Բայց ինչո՞ւ Սամվել Աբրահամյանից չէք ճշտում...

-Որևովհետև դուք ՀԱԿ համակարգողն եք, և ես կցանկանայի իմանալ՝ արդյո՞ք ՀԱԿ-ում նման քննարկումներ են ընթանում...

-Դուք, հավանաբար, չեք հետևել Կոնգրեսի հայտարարություններին, որովհետև դրա մասին երկու հայտարարություն է ընդունվել, մեկը հոկտեմբերի 28-ին, մյուսը` նոյեմբերի 25-ին: Մենք բազմաթիվ հայտարարություններ ենք արել, որտեղ պարզաբանել ենք այդ միտքը: Զարմանում եմ, որ դա ձեզ համար նորություն է: 

-Լավ, ևս մեկ անգամ չե՞ք կրկնի՝ ՀԱԿ-ը ինչ մեխանիզմներ է պատրաստվում կիրառել:

-Ձեզ խորհուրդ եմ տալիս մտնել մեր վեբկայք, նայել այդ հայտարարությունները, այնտեղ ամեն ինչ շարադրված է: 

-Ձեր ասուլիսներից մեկում դուք ասել եք, որ այդ մեխանիզմներից մեկը խորհրդարնում ձայների մեծամասնությունը ստանալով` նախագահին անվստահություն հայտնելն է: Եթե ՀԱԿ-ը խորհրդարանում ձայների մեծամասնությունը չհավաքի, ապա քայլերի ի՞նչ հաջորդականություն եք ծրագրել իրականացնել, ինչպե՞ս է ՀԱԿ-ը պատրաստվում այդ դեպքում հասնել իր նպատակին:

-Դրա պատասխաններն էլ ենք բազմիցս տվել: Նախագահ Տեր-Պետրոսյանի ելույթում այդ մասին էլ է ասվել: Այնպիսի տպավորություն է, որ չեք ծանոթանում այդ տեքստերի հետ: Ես նոր բան չպիտի ասեմ, ամեն ինչ ասվել է:

-Եվս մեկ անգամ չե՞ք կարող կրկնել:

-Բայց ինչի՞ համար, ինչի՞ համար կրկնենք նույն բաները: Պարզ ասվել է, նախագահի ելույթները կարդացեք, այնտեղ գրված է դրա մասին:

Կոնգրեսի համակարգողը, անդրադառնալով հոկտեմբերի 28-ին, հավանաբար ի նկատի ուներ Լևոն Տեր-Պետրոսյանի հանրահավաքային ելույթը, որում իմփիչմենթի վերաբերյալ միայն մի նախադասություն կա. «Եթե, հակառակ գործադրված բոլոր ջանքերին, այնուամենայնիվ առաջիկայում չհաջողվի հասնել Սերժ Սարգսյանի հրաժարականին, իսկ քաղաքականության մեջ ոչինչ բացառված չէ, ապա Կոնգրեսը պետք է ձգտի Ազգային Ժողովում ապահովել այնպիսի ծանրակշիռ ներկայություն, որն առանձին կամ այլ ուժերի հետ կազմած դաշինքով, ի վիճակի լինի անմիջապես բարձրացնելու նրա պաշտոնանկության, կամ այլ կերպ ասած, իմփիչմենթի հարցը», որում, սակայն, ասված չէ, թե ո՞րն է լինելու Կոնգրեսի հաջորդ քայլը, եթե Կոնգրեսին չհաջողվի ապահովել ծանրակշիռ ներկայություն ԱԺ-ում։ Նոյեմբերի 25-ը հիշատակելիս Լևոն Զուրաբյանը կրկին հավանաբար ի նկատի է ունեցել Լևոն Տեր-Պետրեսյանի՝ այդ օրը տեղի ունեցած հանրահավաքի ժամանակ հնչած ելույթը, որի ամենաուշագրավ հայտվածը ՀՀԿ-ԲՀԿ հակասությունների ու դրանց հնարավոր հետևանքների մասին Տեր-Պետրոսյանի անձնական կարծիքն ու քաղաքագիտական վերլուծությունն է, ինչպես ինքը՝ Տեր-Պետրոսյանն է ասում։ Հայ Ազգային Կոնգրեսը, փաստորեն, ոչ հոկտեմբերի 28-ին, ոչ էլ՝ նոյեմբերի 25-ին հայտարարություններով հանդես չի եկել, իսկ Տեր-Պետրոսյանի ելույթում չկա այն հարցի պատասխանը, թե ի՞նչ է անելու Կոնգրեսը՝ ԱԺ-ում Սերժ Սարգսյանին իմփիչմենթի ենթարկելու համար անհրաժեշտ քանակով մանդատ չստանալու կամ խորհրդարանական այլ ուժերի հետ համագործակցելով այդ անհրաժեշտ քանակը չապահովվելու պարագայում։