Դվորկովիչ. Ռուսաստանն ԱՀԿ–ին հնարավոր է միանա դեկտեմբերին

ՌԴ նախագահի օգնական Արկադի Դվորկովիչը հայտարարել է, որ Ռուսաստանի՝ Առևտրի համաշխարհային կազմակերպությանը միանալու գործընթացը կավարտվի մինչև այս տարվա դեկտեմբերի 15–ը։ «Աշխատանքային խումբը հավանաբար կավարտի իր գործերը մինչև նոյեմբերի 11–ը»,– ասել է Դվորկովիչը։ Վերջինս հավելել է, որ Ռուսաստանը պատրաստ է ֆինանսական օգնություն ցույց տալ ԵՄ–ին ճգնաժամից դուրս գալու համար։ ԵՄ–ին օժանդակելու հետ կապված նա հայտարարել է, որ Ռուսաստանը պատրաստ է բանակցություններ սկսել ԵՄ անդամ այն երկրների հետ, որոնք գտնվում են ֆինանսա–տնտեսական ճգնաժամի մեջ։ Սակայն Դվորկովիչը հայտնել է, որ մինչ օրս պաշտոնական Կրեմլը եվրոգոտու երկրներից ոչ մի առաջարկ չի ստացել։ Հաղորդում է Ria Novosti լրատվական ծառայությունը։