Համագործակցություն Բրազիլիայի հետ

ՀՀ առողջապահության նախարար Հարություն Քուշկյանը հանդիպել է Հայաստանում Բրազիլիայի արտակարգ և լիազոր դեսպան Մարսելա Մարիա Նիկոդեմոսին և հյուպատոսական բաժնի ղեկավար Ռոբերտո Ֆուրտադոյին: Այս մասին ասված է ՀՀ առողջապահության նախարարության պաշտոնական կայքում զետեղված հաղորդագրության մեջ։

Դեսպանը ներկայացրել է երկու երկրի միջև համագործակցության իրենց նախընտրած տեսակետը, մասնավորապես՝ խոսել է տեխնիկական համագործակցության «հովանոց» կառույցի ստեղծման հնարավորության մասին, որը կկանոնակարգի համագործակցության ոլորտները: Նա նշել է, որ Բրազիլիան պատրաստ է ընդունելու Հայաստանի առաջարկներն առողջապահության ոլորտում համագործակցություն ծավալելու համար:

Հարություն Քուշկյանը կարևորել է Բրազիլիայի հետ համագործակցությունը և նշել, որ գործընթացը սկսվել է, և առաջիկայում կներկայացվեն առողջապահության ոլորտում նախատեսվող փոխգործակցության ուղղությունները:

Նախարարը հավելել է, որ հետևում է Բրազիլիայում ընթացող բարեփոխումներին և որտեղ առաջընթաց է դիտվում, այդ ոլորտում էլ կծավալվի համագործակցություն:

Առողջապահության նախարարը նշել է նաև, որ բրազիլական բժշկությունը դինամիկ զարգանում է, հատկապես առաջընթաց կա ուռուցքաբանության ոլորտում՝ արյան հիվանդությունների բուժման առումով:

Հարություն Քուշկյանը հետաքրքրվել է նաև մենեջմենտի հարցերով՝ այդ ուղղությամբ ևս համագործակցելու համար:

Նախարար Քուշկյանը շնորհակալություն է հայտնել դեսպանին առողջապահության համակարգին ուղղված դրական, անմիջական վերաբերմունքի համար և համոզմունք արտահայտել հետագա արդյունավետ համագործակցության: