ԱՄՆ-ը պատրաստ է օգտագործել բոլոր միջոցները Սիրիայի վրա ճնշում գործադրելու համար. Բարաք Օբամա

ԱՄՆ–ը պատրաստ է օգտագործել բոլոր միջոցները Սիրիայի իշխանությունների վրա ճնշում գործադրելու և նախագահ Բաշար Ասադի ռեժիմը տապալելու համար։ Այս մասին հայտարարել է ԱՄՆ նախագահ Բարաք Օբաման։

«Մենք կշարունակենք ճնշում գործադրել Ասադի ռեժիմի վրա՝ փնտրելով բռնություններին և անմեղ մարդկանց սպանություններին վերջ տալու բոլոր հնարավոր միջոցները», – ասել է նա Դանիայի վարչապետ Հելե Թորնինգ Շմիդտի հետ հանդիպումից հետո։

ԱՄՆ նախագահը նշել է, որ «միջազգային հանրությունը պետք է հասկացնի Ասադին, որ իշխանության փոխանցումն անխուսափելի է»։
Նա, մեկնաբանելով Թունիսում կայացած «Սիրիայի բարեկամ երկրներ» համաժողովը, կարևորել է, որ այդ համաժողովին ԱՄՆ ներկայացրել է պետքարտուղար Հիլարի Քլինթոնը, հաղորդում է Интерфакс–ը։ Քլինթոնը, ելույթ ունենալով համաժողովի ժամանակ, բոլոր ներկաներին կոչ է արել արգելել Ասադի ռեժիմի բոլոր բարձրաստիճան պաշտոնյաների մուտքն իրենց երկրներ, սառեցնել այդ երկրներում սիրիացի պաշտոնյաների բանկային հաշիվները, սիրիական նավթի էմբարգո հայտարարել և փակել այդ երկրներում Սիրիայի դեսպանությունները և հյուպատոսությունները։

ԱՄՆ պաշտոնյաները դեռ հայտարարում են, որ հնարավոր են համարում Սիրիայի ճգնաժամի քաղաքական լուծումը։ Սակայն իրենց ելույթներում չեն բացառում նաև Ասադի ռեժիմի դեմ ռազմական գործողությունների սկսումը։