«Չորրորդ ինքնիշխանություն». Մենք էլ ենք ողջունում

«Մենք ողջունում ենք կառավարության բոլոր քայլերը, ընդդիմությանը լուրջ գործիքակազմ տվող օրենսդրական նախաձեռնությունները, որոնք ուղղված են ազատ, արդար և թափանցիկ ընտրությունների անցկացմանը», հայտարարել է Հայաստանում ԱՄՆ դեսպան Ջոն Հեֆերնը:
«ՉԻ»- Այ քեզ հաջողություն: Բանից պարզվում է՝ կառավարությունը հանդես է եկել օրենսդրական նախաձեռնություններով, որոնց շնորհիվ ընդդիմությունը կկարողանա ավելի լավ վերահսկել ընտրությունները: Որևէ մեկը երբևէ լսե՞լ է այդպիսի նախաձեռնության մասին: Որքան հիշում ենք՝ ճիշտ հակառակն է եղել. իշխանությունները մերժել են ընտրությունների մասնակիցների ցուցակների հրապարակման, մատների թանաքոտման, տեսախցիկների տեղադրման և այլ պահանջներ: Բայց այս ամենը կապ չունի: Կարևորն այն է, որ ամերիկյան դեսպանը ողջունում է: Եվ թող որևէ մեկի մեջ տպավորություն չստեղծվի, թե չեղած բաները ողջունելը, մեղմ ասած, տարօրինակ սովորույթ է: Ամենևին: Մեր իրականության մեջ նույնպես դա բավականին տարածված է: Այնպես, որ մենք էլ մեր կողմից ողջունում ենք Հայաստանում ԱՄՆ դեսպանի անկողմնակալ և սրտացավ վերաբերմունքը Հայաստանում ընթացող ներքաղաքական զարգացումների նկատմամբ: