Պենտագոնն արդիականացնում է զինատեսակներն Իրանի դեմ հնարավոր պատերազմի նպատակով

Պենտագոնը մեծացնում է ռազմական ազդեցությունը Պարսից ծոցի շրջանում, որպեսզի Իրանը չկարողանա փակել Օրմուզի նեղուցը այդ երկրի դեմ նավթային էմբարգո հայտարարելու դեպքում, հաղորդում է Wall Street Journal–ը։

Ըստ թերթի, ԱՄՆ-ը զինուժը դիմել է Կոնգրեսին ֆինանսական լրացուցիչ միջոցներ տրամադրելու պահանջով՝ հետախուզական գործողություններն ընդլայնելու նպատակով։ Նրանք նաև մտադիր են շտապ թարմացնել այդ տարածքներում տեղակայված հրթիռները և նավերի սպառազինությունը, որոնք կարող են օգտագործվել Իրանի արագընթաց ռազմական մոտորանավակների դեմ։

«Այս քայլերը փաստում են, որ Իրանի դեմ պատերազմ է նախապատրաստվում անգամ այն դեպքում, երբ Սպիտակ տան բարձրագույն ղեկավարությունը և պաշտպանության նախարարությունը հայտարարում են, որ իրենք ամեն բան անում են խնդիրը խաղաղ ճանապարհով կարգավորելու համար», – գրում է Wall Street Journal–ը։

Տարածաշրջանում ԱՄՆ կենտրոնական հրամանատարության ղեկավար՝ գեներալ Ջեյմս Մատիսը, ռազմական արդիականացման պահանջով դիմել է Կոնգրեսին, այն բանից հետո, երբ Պենտագոնի ռազմական փորձագետները ԱՄՆ–ի զինուժում ռազմական պատրաստվածության բացթողումներ են հայտնաբերել, հաղորդում է «Ռիա նովոստին»։

«ԱՄՆ–ի կենտրոնական հրամանատարության մտահոգությունը պայմանավորված է Իրանի կողմից Օրմուզի նեղուցն ականապատելու միջոցով փակելու դեպքում արագ արձագանքման Օրմուզի նեղուցը համարվում է արտահանվող համաշխարհային նավթի 20%–ի միակ ճանապարհը», – նշում է թերթը։

Հիշեցնենք, որ Պարսից ծոցում իրավիճակի սրման պատճառ դարձավ Իրանի իշխանությունների կողմից Օրմուզի նեղուցը փակելու մասին հայտարարությունը, որը պայմանավորված է Արևմուտքի կողմից այդ տարածքով համաշխարհային շուկա արտահանվող իրանական նավթի վրա էմբարգո կիրառելու վտանգով։ Դեկտեմբեր ամսին Իրանի ռազմածովային ուժերը Օրմուզի նեղուցում լայնածավալ զորավարժություններ էին անցկացրել, որն ավարտվել էր հեռահար հրթիռների փորձարկումով։