Սերբիան և Կոսովոն համաձայնվել են համագործակցել

Պաշտոնական Բելգրադը Կոսովոյի հետ համաձայնության է եկել տարածաշրջանային համագործակցության և սահմանային անցակետերում համատեղ վերահսկողություն իրականացնելու շուրջ, այն բանից հետո, երբ Եվրոպական միությունը մի քանի օր առաջ որոշում էր կայացրել  ԵՄ–ին Սերբիայի անդամակցության վերաբերյալ, հաղորդում է BBC Russian–ը։ 

Ըստ նախօրեին ձեռք բերված պայմանավորվածությունների՝ Պրիշտինան հնարավորություն է ստանում շրջանային համաժողովներում առանձին ներկայանալու, թեև պաշտոնական Բելգրադը դեռևս չի ճանաչում Կոսովոյի անկախությունը։

Սերբիայի իշխանություններն ընդունել են ԵՄ–ի առաջարկը, որ ԵՄ գագաթաժողովների և այլ հանդիպումների ժամանակ Կոսովոյի անվան կողքին աստղանիշ դրվի՝ շեշտելով այդ տարածքի վիճահարույց կարգավիճակը։

Կողմերը նաև պայմանավորվել են համատեղ վերահսկողություն իրականացնել սահմանամերձ շրջաններում, որտեղ հաճախ բախումներ են լինում ՆԱՏՕ-ի խաղաղապահների և սերբերի միջև, որոնք հիմնականում բնակվում են Կոսովոյի հյուսիսային շրջաններում։

Պայմանավորվածությունները ձեռք են բերվել մի երկու ամիս տևած դժվար բանակցությունների արդյունքում։

Հիշեցնենք, որ Կոսովոն Սերբիայի կազմից դուրս եկավ և անկախություն ստացավ 2008–ին։ Այդ որոշմանը հետևեց մոտ 80 երկրների կողմից Կոսովոյի ճանաչման գործընթացը։