Սահմանադրական դատարանի որոշմանը «Դ!եմ եմ»-ը կսպասի լուռ ակցիայով

«Դ!եմ եմ» նախաձեռնությունը մարտի 28-ին լուռ ակցիա կանցկացնի Սահմանադրական դատարանի դիմաց, որն այդ օրը կսկսի «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ» գործի դատաքննությունը: Այս մասին տեղեկացանք նախաձեռնության ֆեյսբուքյան էջից: «Հավաքվում ենք մարտի 28-ին՝ ժամը 12:30-ին, Սահմանադրական դատարանի դիմաց: Իրականցնելու ենք գեղեցիկ ու խորհրդանշական ակցիա՝ առանց կոչերի, առանց ելույթների: Այդ օրն սկսվում է դատաքննությունը, ուստի մենք չպետք է որևէ կերպ խանգարենք բարձր դատարանի բնականոն աշխատանքը, ուստի և ելույթների, կոչերի փոխարեն կարող են լինել, օրինակ, ավելի քան խոսուն պաստառներ: Յուրահատուկ ու խորհրդանշական ձևով կփոխանցենք անաչառության մեր կոչը Սահմանադրական դատարանին, այնուհետ, չցանկանալով որևէ կերպ խանգարել բարձր դատարանի բնականոն աշխատանքը, կավարտենք այդ օրվա մեր ակցիան և կակնկալենք Դատարանի անկողմնակալ որոշում»,-ասված է հայտարարության մեջ:

«Երկիր մեդիա» հեռուստաընկերության լրատվական և քաղաքական հաղորդումների տնօրեն Գեղամ Մանուկյանը ևս հայտնել է, որ մարտի 26-ին «Երկիր Մեդիայի» տեխնիկական աշխատողները Սահմանադրական դատարանում փորձարկելու են ուղիղ եթերի համակարգը։ «Մարտի 28-ին դատական ողջ քննարկումը սփռվելու է մեր հեռուստաընկերության եթերում։ Ասել է թե՝ Հայաստանի Հանրապետության, Լեռնային Ղարաբաղի Հանրապետության, Ջավախքի տարածքում, և աշխարհի բոլոր հատվածներում։ Քանի որ Կենսաթոշակայինի պարտադիրության հարցը համազգային խնդիր է»,-«Ֆեյսբուք» սոցիալական ցանցում գրառում է կատարել Գեղամ Մանուկյանը:

Հիշեցնենք, որ Հայաստանի Հանրապետությունում հունվարի 1-ից գործարկվում է կենսաթոշակային պարտադիր կուտակային համակարգը, ըստ որի' 1974 թվականից հետո ծնված քաղաքացիները կկատարեն 5 տոկոսի չափով պարտադիր վճարումներ' կուտակային հիմնադրամներին: Կենսաթոշակային համակարգի մասնակիցների գումարները կառավարվելու է ֆոնդի կառավարիչների միջոցով: «Դ!եմ եմ» նախաձեռնությունը պայքարում է պարտադիր բաղադրիչը չեղյալ հայտարարելու համար: