«Ծառուկյանը փորձում է իր վիթխարի մարմինը թաքցնել Օսկանյանի թիկունքում»

Գոռ Հարությունյանը ֆեյսբուքյան իր էջում գրել է.

«Այն, որ ԲՀԿ-ից որևէ հոդաբաշխ և պաշտոնական դիրքորոշում իմանալը անհնար է՝ գաղտնիք չէ հայաստանյան իրականությանը քիչ թե շատ ծանոթ որևէ մեկին: Կուսակցության որևէ պատգամավոր կարող է ցնցող քաղաքական դիրքորոշում արտահայտել, սակայն քիչ անց երիտբհկականներից մեկը կարող է հայտարարել, որ դա տվյալ անձի անձնական տեսակետն է և որևէ կերպ առնչություն չունի կուսակցության պաշտոնական դիրքորոշման հետ: Ամենահետաքրքիրը այն է, որ այդ պաշտոնական դիրքորոշում կոչվածը երբեք այդպես էլ չի հնչում՝ սպասումի հուզումնառատ պահեր պարգևելով հասարակությանը: Այդ գործելաոճը հավանաբար հարմարավետորեն տեղավորվում է և հաճույք ստանալու, և կույս մնալու քաղաքական գծի մեջ:

Ավելին, տպավորություն է ստեղծվում, որ ԲՀԿ-ի պաշտոնական տեսակետները նախորոք հայտարարում է Ռոբերտ Քոչարյանը՝ որևէ մանրակրկիտ մշակված տեքստ նետելով իր ոչ պաշտոնական կայքը, որից հետո Բարգավաճի քարոզչամեքենան նետվում է քոչարյանական թեզիսները կյանքի կոչելու:

Բազմիցս ԲՀԿ-ի առանցքային դեմքերից մեկը՝ Վարդան Օսկանյանը, հայտարարություններ է արել, որոնք հետագայում խնամքով սրբագրվել են ԲՀԿ-ի խոսափողների միջոցով՝ հայտարարության պատասխանատվությունը թողնելով Օսկանյանի վզին: Ինքնին հասկանալի է, որ հանուն էժան ռեյտինգի չկարողանալով զսպել այն ամենին հակադրվելու կիրքը, որի աջակիցներն են եղել ժամանակին, ԲՀԿ-ն պարզապես պոպուլիզմ է խաղում՝ թողնելով, սակայն, խուսանավելու բոլոր հնարավորությունները:

Տարիներ շարունակ լինելով Ռուսաստանի հետ ռազմավարական հարաբերություններ կառուցելու ամենաթունդ կողմնակիցներից մեկը՝ ԲՀԿ-ն առիթը բաց չի թողնում ներքին էշելոնների միջոցով տպավորություն ստեղծել, իբր համաձայն չէ ՀՀ-ում վարվող արտաքին քաղաքականության հետ: Սակայն նույն կուսակցության առաջնորդը առիթը բաց չի թողել երբեք՝ Ռուսաստանի պաշտոնյաների, Լուկաշենկոյի, Յանուկովիչի հետ որևէ ֆոտոկադրում ֆիքսվելու պատեհ առիթը, ինչպես նաև մշտապես, թե որպես կոալիցիայի ներսում, թե դրանից դուրս, հանդես գալու Ռուսաստանի հետ հարաբերությունների օգտին:

Այժմ, երբ ՄԱԿ-ում հայտնի քվեարկությամբ Հայաստանը քվեարկել է Ուկրաինայի ներկայաձրած բանաձևի դեմ, ԲՀԿ առաջնորդը կրկին լռում է: Որովհետև նա երբեք չի արտահայտվում կարևորագույն հարցերի շուրջ, շարունակում է փոքրիկ խաղերով թոզ փչել հասարակության աչքերին: Հայաստանի արտաքին քաղաքական հարցերում ուրիշ ինչպիսի՞ շրջադարձային կետ պետք է լիներ, որ ԲՀԿ առաջնորդը բարեհաճեր խոսել: Փոխարենը կրկին լրատվամիջոցներով շողաց Վարդան Օսկանյանը՝ հայտարարելով՝ ՄԱԿ-ի Գլխավոր վեհաժողովում Հայաստանը պետք է ձեռնպահ քվեարկեր Ուկրաինայի ներկայացրած բանաձևին: Շատ լավ, սա նշանակում է, որ ԲՀԿ-ն շեղվում է արտաքին քաղաքականությունում իր որդեգրած ռուսական գծից: Այդպիսի կտրուկ շրջադարձի մասին ինչու՞ չի հայտարարում կուսակցության ղեկավարը: Թե հերթական անգամ Օսկանյանի շուրթերով հաճոյանալով Արևմուտքին՝ Ծառուկյանը փորձում է իր վիթխարի մարմինը թաքցնել Օսկանյանի թիկունքում: Վաղը Ուրիխանյանը կարող է հայտարարել, որ Օսկանյանի դիրքորոշումը ԲՀԿ-ի պաշտոնականը չէ, և կրկին լղոզված հայտարարություններով փորձել թաքցնել այն հասարակ երևույթը, որը կոչվում է պաշտոնական դիրքորոշում:

Կամ էլ ԲՀԿ-ի քաղաքական նախահայրը դեռևս չի արտահայտվել և ԲՀԿ-ն սպասում է, թե Քոչարյանը երբ կբարեհաճի հերթական ճանապարհային քարտեզը հրապարակել 2rd.am կայքում: Երևի առանց հիմնադիր հոր՝ Լեյտենանտ Շմիտդի զավակները չեն կարողանում բաժանել սագագողության պրովինցիաները»: