Քեսաբի քաղաքապետը հերքում է հայերի սպանությունների մասին տեղեկությունները

Ինչպես հայտնում է ria.ru-ն, Քեսաբի քաղաքապետ Վազգեն Չափարյանը, Ազատություն ռադիոկայանի հետ տեղի ունեցած հեռախոսազրույցի ընթացքում հերքել է տարբեր լրատվական աղբյուրների տարածած տեղեկություններն ու տեսանյութերն այն մասին, որ Քեսաբում զանգվածաբար հայեր են սպանվել: 

«Նման տեղեկությունները չեն համապատասխանում իրականությանը, մենք զոհեր չունենք»,-ասել է Չափարյանը:

Համացանցում նաև տեղեկատվություն է տարածել այն մասին, որ անհետացել է 40 քեսաբահայ: Քաղաքապետը չի հաստատել այդ տեղեկատվությունը՝  նշելով, որ Քեսաբում մնացել էին 38 հայ ծեր, սակայն նրանք նույնպես հատուկ խմբերի հետ տեղափոխվել են Լաթաքիա: «20 մարդ տեղափոխվել է, մնացել է ևս 18-ը, որոնց տեղափոխման աշխատանքներն իրականացվում են»,- ասել Չափարյանը՝  հավելելով, որ ներկայումս Լաթաքիայում ապաստան է գտել մոտ 700 հայ ընտանիք:

Ըստ նրա տեղեկությունների` Քեսապում բոլոր տներն ու հաստատությունները թալանված են, իսկ գողոնները մեքենաներով տեղափոխվել են Թուրքիա:

Այն հարցին, թե արդյոք Թուրքիայի կառավարությունը ներգրավված է այն  գործողությունների մեջ, որը տեղի է ունենում  Քեսաբում, քաղաքապետը պատասխանել է հստակ. «Սահմանը բաց էր: Ինչո՞ւ նրանք բացեցին սահմանը»: