Նիկոլ Փաշինյան. «Այս պահին այլևս Հայաստանում Պարտադիր բաղադրիչի մասին օրենք գոյություն չունի»

Նիկոլ Փաշինյանը ֆեյսբուքյան իր էջում գրել է.

«Զարմացած եմ իշխանության ներկայացուցիչների այն հայտարարություններով, թե ՍԴ այսօրվա որոշումից հետո Կուտակային կենսաթոշակի պարտադիր բաղադրիչը շարունակելու է գործել:

Սահմանադրական դատարանի մասին ՀՀ օրենքի 68-րդ հոդվածի 10-րդ մասը հստակ սահմանում է. «Վիճարկվող ակտն ամբողջությամբ կամ մասամբ Սահմանադրությանը հակասող եւ անվավեր ճանաչելու մասին որոշում ընդունվելու դեպքում այն իրավաբանական ուժը կորցնում է Սահմանադրական դատարանի որոշումն ուժի մեջ մտնելու պահից, բացառությամբ սույն հոդվածի 12-րդ եւ 13-րդ մասերով սահմանված դեպքերի»:

Ու քանի որ բացառություն սահմանող 12-րդ եւ 13-րդ մասերը տվյալ խնդրի հետ չեն առնչվում, իսկ ՍԴ որոշումն ուժի մեջ է մտել հրապարակման պահից, այսօր կեսօրից պարտադիր բաղադրիչը, ինչպես նաեւ օրենքի հակասահմանադրական ճանաչված մյուս դրույթները այլեւս իրավաբանական ուժ չունեն:

Սա նշանակում է, որ այս պահին այլեւս Հայաստանում Պարտադիր բաղադրիչի մասին օրենք գոյություն չունի: