«Իզուր են որոշ գործիչների քառաձայն անհիմն տվայտանքները». Մարգարիտ Եսայան

Մարգարիտ Եսայանը ֆեյսբուքյան իր էջում գրել է.

«ՀՀ գլխավոր օրենքի 55-րդ հոդվածը կարգավորում է բոլոր այն իրավիճակները, երբ պետք է նշանակել վարչապետ եւ կառավարություն, ըստ այդմ՝ վարչապետի հրաժարականից հետո տասնօրյա ժամկետում երկրի նախագահը նոր վարչապետ է նշանակում, իսկ նոր կառավարությունը ձեւավորվում է քսանօրյա ժամկետում; Այն գործընթացը, որ սկսվեց եւ կշարունակվի Տիգրան Սարգսյանի հրաժարականից հետո, ամբողջովին սահմանադրական է եւ կարգավորվում է երկրի գլխավոր օրենքով: Բառացիորեն մոտ երկու շաբաթ առաջ մի հարցազրույցում ասել էի, որ եթե երկրում վարչապետ փոխի կամ կառավարության, դա կլինի միայն այն դեպքում, երբ երկրի նախագահը կորոշի փոխել վարչապետին եւ կառավարությունը:

Այսօր ականատեսն ենք, որ երկրի նախագահը որոշում է կայացրել փոխել վարչապետին եւ նոր կառավարություն ձեւավորել, եւ, իզուր են որոշ գործիչների քառաձայն անհիմն տվայտանքները, թե իրենք այս գործում ինչ-որ դերակատարություն ունեն:
Քաղաքականության մեջ ցանկալին իրականության հետ շփոթելը ոչ մի տեղ չտանող ճանապարահ է: Կա իրական քաղաքականություն, կա քաղաքական մեծամասնության ղեկավար, ով որոշել է գնալ փոփոխությունների, սա է իրականությունը եւ պետք չի գերագնահատել սեփական հնարավորությունները:

Հ.Գ.Արդեն որոշ անուններ են դրվում շրջանառության մեջ, որպես հավանական վարչապետացուներ...., քաղաքական կուբիկ-ռուբիկներ շատ ենք տեսել, բայց մեկ բան պետք է պարզ լինի ոմանց համար՝ վարչապետ կդառնա նա, ում մասին որոշում կկայացնի երկրի նախագահ Սերժ Սարգսյանը»: