Պուտինն ընդունելի է համարում Իրանի՝ ատոմային էներգետիկա ունենալու իրավունքը

ՌԴ վարչապետ Վրալդիմիր Պուտինն ընդունելի է համարել Իրանի՝ ատոմային էներգետիկա ունենալու իրավունքը և զգուշացրել, որ Իրանի ուղղությամբ ռազմական հարվածները կարող են աղետալի հետևանքներ ունենալ։ Պուտինն առաջարկել է Իրանի միջուկային հարցը լուծել խաղաղ ճանապարհով։ Այդ մասին նա գրել է իր նոր՝ «Ռուսաստանը և փոփոխվող աշխարհը» հոդվածում, որը հրապարակվել է այսօր՝ «Մոսկովսկիե նովոստի» թերթում։ 

«Մենք առաջարկում ենք ընդունել Իրանի՝ քաղաքացիական միջուկային ծրագրի զարգացման իրավունքը, այդ թվում՝ ուրանի հարստացման։ Բայց փոխարենն Ւրանը պետք է համաձայնի իր միջուկային գործունեությունն իրականացնել ՄԱԳԱՏԷ-ի հուսալի և բազմակողմանի վերահսկողության ներքո։ Ռուսաստանին մտահոգում է այդ երկրի ուղղությամբ ռազմական հարվածի ահագնացող սպառնալիքը։ Եթե այն տեղի ունենա, հետևանքները իրապես աղետալի կլինեն։ Դրանց իրական մասշտաբները անհնարին է պատկերացնել»,-ասել է Պուտինը։