Եմենում ցուցարարները պահանջում են արտաքսել ԱՄՆ դեսպանին

Եմենում անցկացված բողոքի ցույցերի ժամանակ ցուցարարները պահանջել են իշխանություններից արտաքսել ԱՄՆ–ի դեսպան Ջերալդ Ֆիշերին, հաղորդում է РБК–ն։ Ինչպես հաղորդվում է, բողոքի ցույցերը տեղի են ունեցել երկրի մի քանի քաղաքներում։ Բացի այդ, ցուցարարները պահանջել են դադարեցնել երկրի ներքին գործերին ԱՄՆ–ի միջամտությունը։     

Սա առաջին դեպքը չէ, որ ցուցարաները պահանջում են երկրից ԱՄՆ–ի դեսպանի արտաքսումը։ Անցյալ տարի դեկտեմբերին եմենցիները նման պահանջով իրենց դժգոհությունն էին արտահայտել Ֆիշերի նկատմամբ՝ երկրի մի քանի քաղաքներում բողոքի երթեր անցկացնելով։ Այդ ժամանակ ամերիկացի դիվանագետը ցուցարաների գորոծողությունները թշնամանք էր համարել՝ նշելով, որ դրանք քաոսային իրավաճակի ստեղծման և բռնությունների են դրդում անվտանգության ուժերին։ 

Հիշեցնենք, որ 2011–ի հունվարի Եմենում սկսվել էին հակակառավարական բողոքի ցույցեր, որոնց մասնակիցները պահանջում էին իշխանությունների հրաժարականը, մասնավորապես՝ երկրի նախագահ Ալի Աբդալա Սալեհի պաշտոնանկությունը։ Անցյալ տարվա հունիսին նրա հակառակորդների կողմից հարձակման ենթարկվելու հետևանքով Սալեհը վիրավորվել էր և անմիջապես բուժումն անցել Սաուդյան Արաբիայում, այնուհետև՝ ԱՄՆ–ում։

Աշնանը Սալեհն իշխանությունը հանձնելու համաձայություն էր տվել սեփական անվտանգության և քրեական հետապնդումների չենթարկվելու երաշխիքներ ստանալու պայմանով։ 

Փետրվարի 21–ին Եմենում անցկացված նախագահական ընտրությունների արդյունքում նախագահ է ընտրվել երկրի փոխնախագահ և նախագահի միակ թեկնածու Աբդուրաբ Մանսուր Հադին, որը ստացել էր ընտրողների գրեթե 98% ձայները։ Նորընտիր նախագահի երդման օրը նշանակված է փետրվարի 27–ին։