Սիրիայում կայացավ սահմանադրական հանրաքվեն. երկրում բռնությունները շարունակվում են

Սիրիայի իշխանությունները նախօրեին սահմանադրական փոփոխությունների հանրաքվե են անցկացրել, թեև անվտանգության ուժերի կողմից երկրում քաղաքացիների նկատմամբ բռնությունները շարունակվում են։ Կիրակի օրը առնվազն 30 մարդ է զոհվել բռնությունների հետևանքով։ 

Նոր սահմանադրությունը նախատեսում է երեք ամսվա ընթացքում բազմակուսակցական համակարգի ստեղծում և ընտրությունների անցկացում։

Ընդդիմությունը բոյկոտել է քվեարկությունը՝ այն բնութագրելով իբրև իշխանությունների կողմից կազմակերպված ֆարս։

Չնայած շարունակվող բռնություններին և սպանություններին, Սիրիայի իշխանությունները 13 հազար ընտրատեղամաս էին բացել 14.6 միլիոն ընտրողների համար։ Քվերակությանը մասնակցել է նաև նախագահ Բաշար Ասադը։

Ինչպես հաղորդում է BBC Russian–ը, միջազգային ճնշումը նախագահ Բաշար Ասադի ռեժիմի նկատմամբ գնալով աճում է։ ՄԱԿ–ի նախկին Գլխավոր քարտուղար Քոֆի Անանը, որը նշանակվել է ՄԱԿ–ի և ԱՊԼ–ի հատուկ բանագնացը Սիրիայի հարցով, բոլոր կողմերին համագործակցության և ճգնաժամի կարգավորման խաղաղ ելքեր փնտրելու կոչ է արել։

ՄԱԿ–ի վերջին տվյալների համաձայն, 2011–ի մարտից սկսված և մինչ այժմ շարունակվող հակակառավարական բողոքի ցուցերի և բռնությունների պատճառով զոհվել է ավելի քան 5.4 հազար մարդ, սակայն ըստ ընդդիմության տվյալների՝ զոհերի թիվը հասել է 7.300–ի։ 

ԱՄՆ պետքարտուղար Հիլարի Քլինթոնը հայտարարել է, որ «Սիրիայում առկա են քաղաքացիական պատերազմ սկսվելու բոլոր նախադրյալները»՝ նախազգուշացնելով, որ «արտաքին միջամտությունը» կարող է միայն սրել իրավիճակը։

«Ես կարծում եմ, որ եթե մենք քննարկենք բոլոր հնարավոր սցենարները, ապա կպարզվի, որ նրանց մեջ կան շատ վատերը, որոնց մենք փորձում ենք գնահատական տալ», – BBC-ին տված հարցազրույցում ասել է Քլինթոնը։