Սերբիան դե ֆակտո ճանաչել է Կոսովոյի անկախությունը` հանուն Եվրամիությանն անդամակցելու

Սերբիան Եվրամիությանն անդամակցելու իր հնարավորությունները մեծացրել է՝ զիջումների գնալով իր անկախությունը հռչակած Կոսովոյի հարցում։ Նախորդ շաբաթ Բելգրադն ու Պրիշտինան երկու համաձայնագիր են կնքել՝ տարածաշրջանային համագործակցության և երկու երկրների սահմանային անցակետերի միասնական ղեկավարման վերաբերյալ։ Սա, ըստ էության, նշանակում է, որ սերբերը վերջնականապես ճանաչել են Կոսովոյի անկախությունը, գրում է «Ռոսբալտ»-ը։ 

Սերբիայի իշխանությունները, մասնավորապես, համաձայնել են միջպետական տարածաշրջանային ֆորումներին Կոսովոյի ներկայացուցիչների մասնակցությանը։ Մինչ այժմ վերջինիս նման համաժողովներում ներկայացնում էր Կոսովոյում ՄԱԿ-ի առաքելությունը։ Պաշտոնական Բելգրադն, այսպիսով, համաձայնել է Պրիշտինայի պատվիրակության համար «Կոսովո» անվանման գործածմանը, սակայն այն պայմանով, որ «Կոսովո»-ի կողքին աստղանիշ կլինի, ինչը կվկայի երկրի կարգավիճակի հակասականության մասին։ 

Թեև Բելգրադում պնդում են, որ Կոսովոյի անկախության ճանաչման մասին խոսք անգամ չկա, այնուամենայնիվ վերոնշյալ համաձայնագրերը մեկ քայլ առաջ են այդ ուղղությամբ։ Համենայնդեպս, համաձայնագրերի կնքումն այդպես է դիտարկվում Կոսովոյում և ԱՄՆ-ում։ Կոսովոյի պատվիրակության ղեկավար Էդիտա Թահիրին հայտարարել է, որ Սերբիան դե ֆակտո ճանաչել է Կոսովոյի անկախությունը։ ԱՄՆ պետքարտուղար Հիլարի Քլինթոնն իր հերթին հայտարարել է, որ «համաձայնագիրը համահունչ է Կոսովոյի անկախության, տարածքային ամբողջականության և ինքնիշխանության գաղափարին»։ 

Հատկանշական է, որ համաձայնագրերը ստորագրվել են Եվրամիությանն անդամակցելու համար Սերբիայի ներկայացված հայտի քննարկման նախօրեին։ Եվրամիության երկրների արտաքին գերատեսչությունների ղեկավարների հանդիպումը, որի ժամանակ պետք է քննարկվի Սերբիայի հայտը, տեղի է ունենալու այսօր ։ Բրյուսելում չեն թաքցնում, որ Սերբիային հավանաբար կտրվի Եվրամիությանն անդամակցելու թեկնածու երկրի կարգավիճակ։ 

Հատկանշական է նաև, որ Սերբիայում Պրիշտինայի հետ համաձայնագրերը բողոքի առիթ են դարձել, հատկապես՝ ընդդիմության շրջանում։ Երկրի նախկին վարչապետ Վոիսլավ Կոշտունիցան հայտարարել է, որ Սերբիան ստորացված է, իսկ ուլտրաազգայնական ռադիկալ կուսակցության ներկայացուցիչ Դրագան Տոդորովիչը համաձայնագրերի վավերացումը որակել է իբրև պետական դավաճանություն։ 

Հիշեցնենք, որ Կոսովոն միակողմանիորեն իր անկախությունը Սերբիայից հռչակել է 2008-ին։ Այս պահի դրությամբ երկրի անկախությունը ճանաչել է 88 պետություն։