Հայկական լոբբին որոշել է իր զայրույթը թափել ինձ վրա. Մեթյու Բրայզա

Այն բանից հետո, երբ ԱՄՆ նախագահ Բարաք Օբաման 1915–ի իրադարձությունները «ցեղասպանություն» որակեց, հայկական լոբբին որոշեց իր զայրույթը թափել ինձ վրա։ Այս մասին ասել է Ադրբեջանում ԱՄՆ–ի նախկին դեսպան Մեթյու Բրայզան՝ թուրքական Hurriyet–ին տված հարզազրույցում։ 

«Վաշինգտոնում գործող հայկական կազմակերպություններից Ամերիկայի հայկական համագումարը (ANCA) ամեն ինչ արեց ինձ որպես Թուրքիայի և Ադրբեջանի նկատմամբ կողմնակալ դիրքորոշում ունեցող դիվանագետ ներկայացնելու նպատակով։ Նրանք այժմ իմ դեմ օգտագործում են այն փաստը, որ հիմա գտնվում եմ Թուքրիայում։ Այո՛, ես սիրում եմ Թուրքիան, բայց միևնույն ժամանակ սիրում եմ և՛ Հայաստանը, և՛ Ադրբեջանը։ ԵԱՀԿ Մինսկի համանախագահ աշխատած ժամանակ ես հաճախ եմ շփվել հայկական կողմի հետ և երբեք Հայաստանի բարձրաստիճան ղեկավարությունը ինձ չի մեղադրել կողմնակալության մեջ։ Սակայն հայկական լոբբին, ի թիվս այլ բաների, ինձ մեղադրեց ազգությամբ թուրք Զեյնո Բարանի հետ ամուսնանալու մեջ։ Նրանք կարծում են, որ ազգությամբ թուրք կինը կարող է իմ դիվանագիտական գործունեության ընթացքում ազդել ինձ վրա», – ասել է Բրայզան՝ պատասխանելով այն հարցին՝ արդյո՞ք կարելի է համարել, որ իր դիվանագիտական կարիերան զոհ է դարձել իր ամուսնությանը։ Դիվանագետը նշել է, որ կարելի է նույնիսկ այդպես համարել՝ հավելելով, որ ինքն ու իր ընտանիքն այժմ բնակվում են Ստամբուլում։

Հիշեցնենք, որ Ադրբեջանում ԱՄՆ–ի դեսպան Մեթյու Բրայզայի մանդատի ժամկետը լրացել էր 2011–ի դեկտեմբերի վերջին։ Վերջինս ԱՄՆ պետքարտուղարի օգնականի պաշտոնից 2010–ի դեկտեմբերին նախագահ Օբամայի հրամանագրի համաձայն մեկ տարի ժամկետով նշանակվել էր Ադրբեջանում ԱՄՆ–ի դեսպան։ Այդպիսով Բրայզայի նշանակումը համընկել էր ԱՄՆ–ի Սենատի արձակուրդային շրջանի հետ և դուրս էր մնացել Սենատի քննարկումից։

Մինչ այդ, կոնգրեսականներ Ռոբերտ Մենենդեսը և Բարբարա Բոքսերը Սենատի արտաքին հարաբերությունների հանձնաժողովում արգելափակել էին Բրայզայի՝ Ադրբեջանում դեսպանի նշանակումը՝ ամերիկացի դիվանագետի կողմից Հայոց ցեղասպանության և հայ–թուրքական հարաբերությունների վերաբերյալ հակահայկական դիրքորոշում ունենալու պատճառով։