Հայ ավանդական կուսակցությունները հերքել են Քեսաբ զինյալներ ուղարկելու լուրերը

Հայկական ավանդական կուսակցությունները' Հայ Յեղափոխական դաշնակցություն, Սոցիալ-դեմոկրատ հնչակյան և Ռամկավար ազատական կուսկացությունները հանդես են եկել հայությանն ուղղված կոչով: «Վերջին օրերին բավական մեծ թափ է ստացել ապատեղեկատվությունը Քեսաբի և քեսաբահայության վերաբերյալ, որի արդյունքում տարբեր լրատվամիջոցների կողմից շրջ անառության մեջ են դրվել անհիմն և ոչ ճիշտ լրատվություններ: Իրականության չհամապատասխանող այդ տեղեկատվությունների շարքից վերջինն այն լուրն էր, թե Հայաստանի Հանրապետությունից, Արցախից և Լիբանանից 1500 հայ զինյալներ հասել են Տարտուսի նավահանգիստ' այնտեղից Քեսաբ մեկնելու համար: Լիբանանահայ քաղաքական երեք կուսակցությունները հիմնովին հերքում են այս ապատեղեկատվությունը, որ բոլոր պարագաներում վնասակար հետևանքներ է ունենալու»,- նշվում է կոչում:

Կուսակցությունները նաև վերահաստատել են տեղական և տարածշրջանային հարցերում հայության որդեգրած' հարցերը խաղաղ միջոցներով կարգավորելու վարքագիծը և կոչ արել բոլոր լրատվամիջոցներին միայն ստույգ և իրականության համապատասխանող լուրեր հաղորդել: «Մենք վստահ ենք, որ մեր ժողովուրդը' գիտակից հայության որդեգրած քաղաքական վարքագծին, հավատ չի ընծայի նման սուտ լուրերին և որևէ կերպ չի նպաստի ապատեղեկատվության քաղաքականության տարածմանը»,- նշվումէ կոչում: