Դարի հերթական հանցագործությունը՝ միայն մեկ հայի կատարմամբ

Լուրեր.com–ի տեղեկություններով՝ «Զվարթնոց» օդանավակայանում ՀՀ ոստիկանության Քրեական հետախուզության գլխավոր վարչության աշխատակիցների կողմից ձերբակալվել, ապա կալանավորվել է ազգությամբ հայ ՌԴ մի քաղաքացի՝ Գեւորգ անունով։ 25–ամյա երիտասարդն աշխարհի մասշտաբով ամենահզոր հաքերներից մեկն է։ Նրա գործունեության արդյունքում՝ եվրոպական 4 երկրներում, այդ թվում՝ Հոլանդիայում եւ Ռումինիայում, մոտ մեկ շաբաթով կառավարություններն անջատել են իրենց երկրների ամբողջ ինտերնետ կապը։ Երիտասարդի գործունեության վնասը գնահատվում է շուրջ 200 միլիոն ԱՄՆ դոլար։

Մեր տեղեկություններով՝ երիտասարդն իր «կոնտրոլի» տակ է պահել աշխարհի շուրջ 50 միլիոն համակարգիչ։ Գեւորգին մեղադրանք է առաջադրված 500 էպիզոդով։ Ավելացնենք նաեւ, որ մեր տեղեկություններով Գեւորգն այժմ գտնվում է «Երեւան» քրեակատարողական հիմնարկում։

Մանրամասները Լուրեր.com–ը կներկայացնի հաջորդիվ։