Բիլ Քլինթոնը, Յուլիա Տիմոշենկոն և Wikileaks–ի ինֆորմատորը Խաղաղության Նոբելյան մրցանակի թեկնածուներ

ԱՄՆ նախկին նախագահ Բիլ Քլինթոնը և Ուկրաինայի նախկին վարչապետ Յուլիա Տիմոշենկոն դարձել են Նոբելյան մրցանակի թեկնածուներ ևս 231 հայտնի մարդկանց հետ միասին, հաղորդում է Telegraph–ը։

Նոբելյան հանձնաժողովի համակարգող Գեիր Լունդեստադը հայտնել է, որ ինչպես ամեն տարի, այնպես էլ այս անգամ կան «սովորական թեկնածուներ, եկվորներ, աշխարհի չորս անկյուններից ժամանած հայտնի և ոչ այնքան հայտնի մարդիկ»։

Սովորաբար Նոբելյան հանձնաժողովը չի հրապարակում թեկնածուների անունները։ Սակայն այս տարվա Նոբելյան մրցանակի հավակնորդներ են ԱՄՆ նախկին նախագահ Բիլ Քլինթոնը, Գերմանիայի նախկին կանցլեր Հելմուտ Կոլը և այժմ ազատազրկման դատապարտված Ուկրաինայի նախկին վարչապետ Յուլիա Տիմոշենկոն։

Փետրվարի սկզբին հայտնի դարձավ նաև, որ ամերիկացի սպա Բրեդլի Մենինգը, որը մեղադրվում է Wikileaks–ին Պենտագոնի գաղտնի փաստաթղթեր փոխանցելու մեջ, առաջադրվել է Խաղաղության Նոբելյան մրցանակի։