Գուրգեն Խանջյան.Վատ գրողը վատ է գրում անկախ նրանից, թե ով է ՀԳՄ նախագահը

Վերջերս  Գրողների միությունում ստեղծվել է «Գրական բարեփոխումների նախաձեռնող խումբ», որը գլխավորում է Խաչիկ Մանուկյանը։

Այդ բարեփոխումների տակ ստորագրել են 18 գրողներ, ոմանք էլ թեև համամիտ են, բայց չեն ստորագրել։Լուրեր կան, որ նախաձեռնության ենթատեքստում Լևոն Անանյանի պաշտոնաթողության հարցն է։
Այս մասին Lurer.com-ի  լրագրողը զրուցեց գրողների միության անդամ և գրական երիտասարդական բաժնի ղեկավար Գուրգեն Խանջյանի հետ։ 

«Ես հեղափոխությունների կողմնակից չեմ, Անանյանը հիանալի վարչական աշխատող է, եռանդուն մարդ։ Դե իհարկե, հնարավոր չի միշտ գոհ լինել, բայց այս պահին նրան փոխարինող մարդ այս դաշտում չկա։ Եթե անգամ լինի մեկը, ապա նա հանգիստ տանը նստած գրականություն է ստեղծում»,–ասաց Գուրգեն Խանջյանը։

Նրա հավաստմամբ, նրանք, ովքեր այդպիսի բարեփոխումներ են ուզում իրականացնել,  իրենց են տեսնում նախագահի պաշտոնում։

«Նրանք ուզում են հոնորարներ՝ ժամանակին ու առատ, բայց չեն գիտակցում, որ ասելով չի, որ երկնքից գումարները չեն ընկնում, սա հասարակական կազմակերպություն է, որտեղի՞ց նրան այդքան գումար։ Գրողների միությունը ամենից առաջ լավ գրականություն ստեղծելու համար է։ Մնացած հարցերը երկրորդական են։ Նա , ով լավ է գրում, լավ է գրում, ով վատ է գրում, վատ էլ կգրի՝ անկախ նրանից, թե նախագահն ով է»։