Համերգ` նվիրված Դավիթ Հալաջյանի 50-ամյակին

Արամ Խաչատրյան համերգասրահում փետրվարի 24-ին երաժշտասեր հանրությունը նշեց հայ անվանի կոմպոզիտոր Դավիթ Հալաջյանի 50-ամյա հոբելյանը: Հայաստանի պետական ֆիլհարմոնիկ նվագախումբը (գեղարվեստական ղեկավար և գլխավոր դիրիժոր Էդուարդ Թոփչյան) և Հայաստանի պետական կամերային երգչախումբը (գեղարվեստական ղեկավար և գլխավոր դիրիժոր՝ Ռոբերտ Մլքեյան) կատարեցին Հալաջյանի «Missa de Lumine» ստեղծագործությունը: Մենակատարներ՝ Սյուզաննա Մելքոնյան (սոպրանո), Գուրգեն Բավեյան (բարիտոն): Դիրիժոր՝ Էդուարդ Թոփչյան: Համերգին ներկա էր նաև հեղինակը, ում հայ ազգային երաժշտարվեստի զարգացման գործում ունեցած նշանակալի ավանդի համար, ինչպես նաև ծննդյան 50-ամյա հոբելյանի առթիվ հանձնվեց ՀՀ մշակույթի նախարարության բարձրագույն պարգևը՝ Ոսկե մեդալը:
Դավիթ Հալաջյանը ծնվել է 1962 թ. Երևանում: Սովորել է Ռ. Մելիքյանի անվ. ուսումնարանում (Ա. Սաթյանի դասարան), ապա՝ Երևանի կոնսերվատորիայում (պրոֆ. Է. Հովհաննիսյանի դասարան): Կատարելագործվել է Շվեյցարիայում՝ պրոֆ. Ջ. Բեննեթի (կոմպոզիցիա) և պրոֆ. Թ. Կեսլերի (կոմպյուտերային երաժշտություն) ղեկավարությամբ: Ապրում և ստեղծագործում է Ցյուրիխում:

Դավիթ Հալաջյանը հեղինակ է «Missa de Lumine» մեսսայի, կանտատների, ջութակի կոնցերտի, 2 լարային կվարտետի, նվագախմբային, կամերային և վոկալ գործերի, ինչպես նաև էլեկտրոնային երաժշտության: Հալաջյանի ստեղծագործությունները հնչում են բազմաթիվ երկրների բեմերից և ռադիոկայաններից, գործերը հրատարակում է «Mfhlirad Verlag» հրատարակչատունը (Շվեյցարիա):