«Երկիր». Հայտնի չէ՝ պատգամավորի թեկնածուն ՀՀԿ-ակա՞ն է

Ինչպես արդեն տեղեկացրել էր թերթը, թիվ 26 ընտրատարածքում իր թեկնածությունն է ցանկանում առաջադրել «Սենատոր» կազինոյի սեփականատերերից Հովհաննես Օհանյանը: Վերջին շրջանում նա բավականին ակտիվացել է: Թերթի տեղեկություններով նա պարբերաբար հանդիպումներ է ունենում տեղի հեղինակությունների հետ: Փորձում է նաև երիտասարդների «աչքը մտնել», սկսել է ակտիվ համագործակցել նրանց հետ, սեփական միջոցներով երեկույթներ է կազմակերպում: 26 ընտրատարածքը ներկայումս ԲՀԿ-ինն է: Ձեռք բերված վերջին պայմանավորվածության համաձայն, այս ընտրատարածքը մնալու է ԲՀԿ-ին: Տարօրինակ է, թե այս դեպքում ինչու է իրեն կոտորում Հովիկը: Կամ նա տեղյակ չէ ՀՀԿ-ի և ԲՀԿ-ի այս պայմանավորվածությունից, կամ էլ սկսել է հավատալ, որ իրոք Սերժ Սարգսյանի «փեսան» է: Թերթի աղբյուրները պնդում են, որ այս ընտրատարածքում նրան ճանաչում են որպես Սերժ Սարգսյանի փեսա, իսկ հիմնական առիթն այն է,որ Հովիկի մի քանի ընտանեկան միջոցառումներին մասնակցել է նաև առաջին տիկինը՝ Ռիտա Սարգսյանը: Իրականում, նա նախագահի շատ հեռու բարեկամի աղջկա ամուսինն է, և նախագահն այդքան էլ մտերիմ չէ նրա հետ, ինչպես որ տպավորություն է ստեղծվել ժողովրդի մոտ: Պատգամավոր դառնալ ցանկացող երիտասարդին հաճախ կարելի է տեսնել նաև ՀՀԿ-ի գրասենյակում, բայց այդպես էլ հայտնի չէ, նա իրոք ՀՀԿ-ական է, թե ոչ: