Քադաֆիի որդու թիկնապահը հայտնել է վերջինիս փախուստի վայրը

Քադաֆիի որդի Սաադի Քադաֆին փախել է Նիգեր՝ կանադացի, նորզելանդացի, իրաքցի, ռուսաստանցի և ավստրալիացի թիկնապահների ուղեկցությամբ։ Նրանք բոլորը ժամանակին ծառայել են իրենց երկրների հատուկ ծառայություններում։ Այս մասին The National Post–ին հայտնել է այդ թիկնապահական խմբի անդամներից՝ Գարի Պիտերսը, ով հանդիսանում է Քեմբրիջում (Օնտարիո)  գտնվող Can/Aus Security & Investigations International Inc թիկնապահական գործակալության ղեկավարը։

Նիգերի իշխանությունները Սաադի Քադաֆիին ձերբակալել են այս տարվա սեպտեմբերի 11–ին, սակայն նրան էքստրադիցիայի չեն ենթարկել, փոխարենը վերջինիս տալով տնային կալանք։ Այժմ ըստ Պիտերսի՝ Սաադի Քադաֆին ապրում է Նիամեյի նախագահի նստավայրի հարևանությամբ գտնվող թանկարժեք առանձնատանը։ Սակայն ի սկզբանե Սաադին ցանկացել է փախչել Մեքսիկա, որը նրան չի հաջողվել, բացի այդ վերջինս իրեն ապաստան է համարել Կանադան, որտեղ նա ունի անշարժ գույք և կատարած մեծ ներդրումներ, սակայն Կանադայի թագավորական ոստիկանությունը տեղեկացրել է, որ եթե Սաադի Քադաֆին հայտնվի երկրում նրան կձերբակալեն։ Ըստ թիկնապահի հայտնած տեղեկության՝ Քադաֆիի որդիներից կենդանի մնացածները լուրջ ֆինանսական ռեսուրսների են տիրապետում և կարող են դեռևս պայքարել Լիբիայում իշխանությունը հետ վերցնելու համար։