«Չորրորդ Ինքնիշխանություն». ԵՄ-ն մուտք է պահանջում Լեռնային Ղարաբաղ

Երեկ Բրյուսելում տեղի է ունեցել ԵՄ անդամ 27 երկրների ԱԳ նախարարների համատեղ քննարկումը, որի արդյունքում, ի թիվս այլ հարցերի, համատեղ հայտարարություն է ընդունվել Հարավային Կովկասի երկրների, և մասնավորապես, Հայաստանի վերաբերյալ: Քննարկման արդյունքում, մասնավորապես, ԵՄ-ն ողջունել է Արևելյան գործընկերության շրջանակներում նկատված գորխընթացը: Կոնկրետ Հայաստանին վերաբերող հատվածում հայտարարության հեղինակները ընդգծել են, թե ԵՄ-ն ողջունում է առաջընթացը, որը ձեռք է բերվել ԵՄ-ի և ՀՀ-ի միջև Ասոցացման համաձայնագրի շուրջ բանկացություններում: «ԵՄ-ն ընդգծում է 2012-ի մայիսին կայանալիք ԱԺ և 2013-ին կայանալիք նախագահական ընտրությունների միջազգայնորեն ընդունված ժողովրդավարական չափանիշներին համապատասխանության ապահովման բացառիկ կարևորությունը և ուշադիր հետևելու է Հայաստանում ընտրություններից առաջ տեղի ունեցող զարգացումներին: ԵՄ-ն կոչ է անում Հայաստանում առաջիկայում ևս ժողովրդական հաստատությունների ամրապնդմանն ուղղված բարեփոխումները, դատական համակարգի անկախության ուժեղացումը, քաղաքականության բազմակարծության, ԶԼՄ-ների ազատության և հավասար հասանելիության խրախուսումը, ինչպես նաև մարդու իրավունքների պաշտպանության և հիմնարար ազատությունների ապահովումը: ԵՄ-ն շարունակելու է աջակցել այդ բարեփոխումներին: ԵՄ-ն ընդգծում է կոռուպցիայի դեմ արդյունավետ պայքարի կարևորությունը և ողջունում է կոռուպցիայի դեմ պայքարում Հայաստանի հավատարմության մասին հայտարարությունները: Այդ ոլորտում իրական առաջընթացը շարունակում է մնալ որպես հիմքային հարց՝ տնտեսական աճի և զարգացման համար»,- ասված է հայտարարության մեջ:

Հայտարարության հեղինակները նաև առանձին անդրադարձ են կատարել ԼՂ հիմնախնդրին, որտեղ ընդգծել են ԵՄ անհանգստությունը Լեռնային Ղարաբաղի հակամարտության կարգավորման ուղղությամբ Հայաստանի և Ադրբեջանի միջև ընթացող բանակցությունների դանդաղ առաջընթացի կապակցությամբ: ԵՄ ԱԳ նշել են, որ այդ կապակցությամբ ԵՄ-ն նախկինի պես շարունակում է աջակցել ԵԱՀԿ Մինսկի խմբի համանախագահներին և այդ առումով ընդունում է ՌԴ նախագահ Դմիտրի Մեդվեդևի ջանքերը՝ եռակողմ բանակցություններում առաջընթացի հասնելու հարցում:

ԵՄ-ն նորից հայտարարում է Մադրիդյան սկզբունքներին իր աջակցության մասին, և կոչ է արել Հայաստանին ու Ադրբեջանին ակտիվացնել իրենց ջանքերը՝ այդ սկզբունքներով, որպես խաղաղության հիմք՝ համաձայնության հասնելու հարցում: ԵՄ-ն հիշեցնում է Մինսկի խմբի նախագահների և Մեծ ութնյակի երկրների ղեկավարների հայտարարությունները, Դովիլում կայացած բարձր մակարդակով հանդիպումը, և վերջին՝ Սոչիում կայացած հանդիպման ժամանակ երկու երկրների նախագահների կոմից Մինսկի խմբի շրջանակներում ստանձած պարտավորությունները և կոչ է անում դրանց լիակատար իրականացմանը: Այդ առումով ԵՄ-ն իր անհանգստությունն է հայտնում շփման գծի երկայնքով մեկ աճող լարվածության կապակցությամբ և ընդգծում է հրադադարի և փոխվստահության ամրապնդման համար անհետաձգելի միջոցների կիրառման կարևորությունը: ԵՄ-ն պատրաստ է փոխվստահության ամրապնդման համար ցուցաբերել միջոցների կիրառման ակտիվ աջակցություն՝ ԵԱՀԿ Մինսկի խմբի հետ լիակատար փոխգործակցությամբ՝ նպատակ ունենալով աջակցել խաղաղության իրականացմանն ուղղված հետագա քայլերին: Այդ կապակցությամբ ԵՄ-ն ընդգծում է ԵՄ ներկայացուցիչների Լեռնային Ղարաբաղ և հարակից տարածքներ՝ առանց նախապայմանների մուտքի անհրաժեշտությունը:

Խորհուրդը կոչ է անում Գերագույն ներկայացուցչին և Հանձնաժողովին՝ ԵԱՀԿ-ի հետ համատեղ կոնսալտուցիաներով Լեռնային Ղարաբաղի համար նախագծել հետկոնֆլիկտային սցենարեր՝ որպես ԵՄ-ի ապագա մասնակցության համար հիմք: