«Չորրորդ Ինքնիշխանություն». ՀՀԿ-ի համար «չաշխատողները» հայտնվում են ոստիկանությունում

Բավականին լարված է նախընտրական մթնոլորտը Քանաքեռ-Զեյթուն համայնքում: Ինչպես օրեր առաջ տեղեկացրել էր «ՉԻ»-ն, այստեղ մեծամասնական ընտրակարգով պատգամավոր դառնալու հայտ է ներկայացրել ԴԱՀԿ պետ Միհրան Պողոսյանի՝ Քեթրինի Միհրանի «մարդը»։ Խոսքը՝ ՀՀԿ-ական Արթուր Ստեփանյան՝ Չախկալի մասին է: Բանն այն է, որ այս վարչական շրջանի ղեկավար ՀՀԿ-ական Արայիկ Քոթանջյանը վաղուց հակասություններ ունի Միհրան Պողոսյանի և նրա հովանովորյալի հետ, ուստի՝ վերջինս այս օրերին հրապարակային հայտարարում է, թե «կաշխատի» ցանկացած թեկնածուի օգտին, բայց չի պատրաստվում «սատարման» երեկոներ կազմակերպել Չախկալի համար: Այս խոսակցությունների մասին տեղեկացել է Միհրան Պողոսյանը, որը իրավիճակը հասկանալու համար նախաձեռնել է մի ամբողջ «ռազբորկաների» շարք համայնքի՝ «քաղաքականապես հասուն» հատվածի հետ: Մասնավորապես՝ Արայիկ Քոթանջյանին վերջինս հասկացրել է, որ թաղապետին չի կարող օգնության հասնել որևէ կլան, այդ թվում՝ ապարանյանը, և Պողոսյանն ինչպես ցանկանա, այդպես էլ կլինի համայնքում: Քոթանջյանը, բնականաբար, չի թաքցրել իր մտադրությունների մասին՝ հայտարարելով, որ ինքն է որոշելու՝ ում համար ինչ չափով «աշխատի»: Զրուցակիցները կոնսենսուսի չեն եկել, որից հետո համայնքում սկսել է «մենթական տեռորը»:

Միհրան Պողոսյանի և Արթուր Ստեփանյանի կողմնակիցները համայնքի աշխույժ երիտասարդներին, որոնք չեն «աշխատում» ՀՀԿ-ի հետ, կանչել և գայթակղիչ առաջարկներ են ներկայացրել. ոմանց գումար են խոստացել, ոմանց էլ ասել են, թե կարող են լավ աշխատանքով ապահովել նրանց: Նրանք, որոնք չեն համաձայնվել ընդունել «աշխատանքի հրավերը», խոսակցության այլ հարթություն են տարել՝ շոշափելով արժանապատվության և ուժային կառույցների հետ խնդիրներ ուենալու հնարավորությունը:

Արդյունքում ուշ երեկոյան այդ համայքնում որոշակի հեղինակություն ունեցող տղաներից մեկը՝ Տու մականվամբ, հրավիրել է ՀՀ ոստիկանության 6-րդ վարչություն, մի քանի ժամ 6-րդ վարչությունում պահվելուց հետո վերոնշյալ անձը «ազատ է արձակվել»:

«ՉԻ»-ի՝ ոստիկանության աղբյուրների փոխանցմամբ՝ քաքացաուն հորդորել են չխառնվել քաղաքականությանը, այլապես հնարավոր է այլ «սանկցիաներ» հետևեն: Թերթն ավելացնում է նաև, որ բաժին տարվածն այն անձանցից մեկն է, որ հրաժարվել է «աշխատել» ՀՀԿ-ի օգտին: