Լիբիայի հարավ–արևելքում միջտոհմային հակամարտության պատճառով ավելի քան հարյուր մարդ է զոհվել

Լիբիայի հարավարևելյան շրջաններում, մասնավորապես՝ Կուֆրա քաղաքում իրավիճակն ավելի է սրվել միջտոհմային հակամարտությունների պատճառով։ Այդ շրջաններում սկսված միջտոհմային հակամարտությունների պատճառով, ըստ ՄԱԿ–ի տվյալների, զոհվել է ավելի քան հարյուր մարդ, հազարավոր մարդիկ դարձել են փախստականներ։ Դրանց ստույգ թիվը թեև հայտնի չէ, սակայն ՄԱԿ-ի աղբյուրների փոխանցմամբ՝ խոսքը քաղաքի բնակչության մոտ կեսի մասին է։ Քաղաքը նախկինում ունեցել է մոտ 50 հազար բնակչություն, հաղորդում է NEWSru–ն։

Զինված բախումները սկսվել են փետրվարի 12–ին՝ «աֆրիկյան տուբու» և «արաբական զուվայա» ցեղերի միջև։ Տուբուները բնակվում են Լիբիայի հարավարևելյան հատվածներում, Չադում, Սուդանում, Նիգերում։ Նրանք Մուամար Կադաֆիի իշխանության օրոք պարբերաբար հետապնդումների էին ենթարկվում։    

Լիբիայի ժամանակավոր կառավարությունն իրավիճակը հսկողության տակ պահելու նպատակով այդ շրջաններ է ուղարկել զինված ուժերի, սակայն, ըստ ականատեսների, իրավիճակը շարունակվում է լարված մնալ։ Բախումների պատճառով վիավորները տեղափոխվել են մայրաքաղաք Տրիպոլիի հիվանդանոց։ 

Արյունոտ էթնիկ բախումները Լիբիայի հարավարևելյան շրջաններում, ըստ դիտորդների, ևս մեկ լուրջ մարտահրավեր է անցումային կառավարության համար։ Անցումային կառավարության ձևավորման սկզբից այդ խնդիրը հսկողության տակ պահելու համար լուրջ բարդություն է ներկայացրել, որի պատճառը երկրում ոչ բավարար թվով զինված ուժերն են, ազգային բանակի՝ դեռևս ձևավորման փուլում գտնվելը և նման իրավիճակներին ոչ համարժեք պատասխան տալը։ 

Հիշեցնենք, որ անցյալ տարի հոկտեմբերի վերջին իր հայրենի Սիրտ քաղաքում ապստամբների ձեռքով սպանվեց Լիբիան 41 տարի ղեկավարած Մուամար Կադաֆին։ Մինչ այդ, ամիսներ շարունակ երկրի ընդդիմությունը պահանջում էր նրա հրաժարականը։