Հալեպում մեկ օրվա ընթացքում 40 մարդ են զոհվել

Հալեպում ապրիլի 17-ին ռմբակոծությունների և կրակոցների հետևանքով մոտ 40 խաղաղ քաղաքացի է զոհվել, ավելի քան 100 մարդ վիրավորվել են: Աղբյուրի տեղեկացմամբ` թեև Հալեպի հայաբնակ շրջանները ռազմական գործողությունների դաշտում չեն հայտնվել, սակայն Սուլեյմանիեի, Ազիզիեի, Թելեֆոն Հաուայի թաղամասերը գրեթե ամայացած են: Քաղաքի բնակիչները պատերազմական ծանր օրեր են ապրում: Դժվարին վիճակի պատճառով Հալեպի մուտքի ճանապարհները փակվել են, և հնարավորություն չկա քաղաք սննդամթերք և անհրաժեշտ պարագաներ մտցնել: Մարդասիրական օգնությունները Հալեպի մուտքի մոտ սպասում են հարմար պահի:

Ավելի վաղ տեղեկություններ էին ստացվել, որ ապրիլի 17-ին Հալեպում հայ էր վիրավորվել: 1966թ. ծնված Կարո Ավագյանը վիրավորվել էր Ջաբրիի շրջանում:

Սիրիական ՍԱՆԱ գործակալությունն իր հերթին տեղեկացնում է, որ Հալեպում ռմբակոծության հետևանքով զոհվել է 21 մարդ, այդ թվում՝ 2 երեխա, և վիրավորվել 80 քաղաքացի:

ՄԱԿ-ի տվյալներով` Սիրիայում եռամյա հակամարտության ընթացքում զոհերի թիվը գերազանցել է 130 հազարը: Զոհված հայերի թիվը գերազանցել է 80-ը: